لکھنؤ، 7/نومبر (ایس او  نیوز /ایجنسی) لکھنؤ کے ورندا ون کالونی اراولی اپارٹمنٹ کی دسویں منزل سے سبکدوش اے ڈی جے ایس پی تیواری کی بیٹی پریتی دیویدی (40) کی بدھ کو موت واقع ہو گئی۔ اس کی اطلاع ناتی نے ایک سیکورٹی گارڈ کی مدد سے نانا کو دی۔ ایس پی تیواری اپنی بیوی کے ہمراہ اراولی اپارٹمنٹ پہنچے جہاں انھوں نے بیٹی کی لاش خون سے بھیگی ہوئی پائی۔ سبکدوش جج نے اپنی بیٹی کے قتل کا الزام پی این بی میں لاء آفیسر داماد رویندر دویدی پر عائد کرتے ہوئے پولیس کو تحریر دی۔ اس کے بعد پولیس نے پریتی کے شوہر کو حراست میں لے کر تحقیقات شروع کر دیں۔ دوسری جانب، رویندر دویدی کا کہنا ہے کہ پریتی نے ذہنی تناؤ کی وجہ سے خودکشی کی۔

مہلوک لڑکی کے اہل خانہ کے مطابق پریتی نے 5 نومبر کو ان سے فون پر بات کرتے ہوئے جانکاری دی تھی کہ اس کے شوہر نے 80 لاکھ روپے کا قرض لیا ہے، جس کی وجہ سے وہ ذہنی تناؤ اور جسمانی تشدد کا سامنا کر رہی تھی۔ اس نے اپنے والد سے یہ بھی کہا تھا کہ اگر ممکن ہو تو اپنا ایک پلاٹ فروخت کرکے وہ قرض ادا کر دیں۔ بیٹی کی کال آنے پر منگل کو ایس پی تیواری اراولی اپارٹمنٹ پہنچے تھے۔ انہوں نے الزام لگایا کہ داماد رویندر نے انہیں گالی دیتے ہوئے گھر میں گھسنے نہیں دیا۔ ایس پی تیواری نے یہ بھی بتایا کہ بیٹی کی موت کے بعد جب وہ اپارٹمنٹ میں پہچنے تو ان کا داماد وہیں احاطہ میں گھوم رہا تھا اور انہیں دیکھتے ہی پھر گالی گلوج کرنے لگا۔

اس معاملے میں پی جی آئی روی شنکر ترپاٹھی نے بتایا کہ پریتی کی لاش گراؤنڈ فلور پر پڑی ملی ہے۔ شروعاتی جانچ میں پتہ چلا ہے کہ وہ دسویں منزل سے گری تھی۔ ایسے میں پوسٹ مارٹم رپورٹ اہم ہے جس کی بنیاد پر آگے کی جانچ کی جائے گی۔ پریتی کے والد نے داماد پر قتل کا الزام لگاتے ہوئے مقدمہ درج کرنے کا مطالبہ کیا ہے۔ وہیں رویندر نے پولیس کو بتایا ہے کہ پریتی سیجوفرینیا (ذہنی مرض) سے پریشان تھی، جس کا علاج بھی چل رہا تھا۔ حالت میں سدھار نہیں ہوا اوراس نے دسویں منزل سے کود کر خودکشی کرلی۔ قابل ذکر ہے کہ گوتمی نگر باشندہ ایس پی تیواری سال 2011 میں اے ڈی جے کے عہدہ سے سبکدوش ہوئے ہیں۔