کولکاتا، 14/اکتوبر (ایس او نیوز/ایجنسی) مغربی بنگال کے 12 میڈیکل ایسوسی ایشنوں کے نمائندوں اور ریاستی چیف سکریٹری منوج پنت کے درمیان پیر کو ہیلتھ بلڈنگ میں ہوئی ایک اہم میٹنگ بغیر کسی نتیجے کے ختم ہو گئی۔ ذرائع کے حوالے سے دی جا رہی خبروں میں بتایا جا رہا ہے کہ ریاستی حکومت جاری تعطل کا حل تلاش کرنے کے لئے تاریخ مقرر کرنے سے گریز کر رہی ہے۔ بتایا جاتا ہے کہ ڈاکٹروں کے نمائندوں نے میٹنگ میں ہیلتھ سکریٹری این ایس نگم کی غیر حاضری پر سوال اٹھائے۔ ساتھ ہی انہوں نے پنت سے زور دے کر کہا کہ بھوک ہڑتال پر بیٹھے جونیئر ڈاکٹرس سے براہ راست بات کریں۔

سرکاری ذرائع سے ملی اطلاع کے مطابق منگل کو آ ر جی کر معاملے پر سپریم کورٹ میں ہونے والی سماعت میں شامل ہونے کے لئے ہیلتھ سکریٹری این ایس نگم دہلی گئے ہیں۔ اس وجہ سے وہ ڈاکٹروں کے ساتھ ہوئی میٹنگ میں شامل نہیں ہو سکے۔ اس درمیان مغربی بنگال ڈاکٹرس فورم کے صدر ڈاکٹر کوشک چاکی نے خبر رساں ایجنسی ’پی ٹی آئی‘ سے کہا کہ ’’میٹنگ بے نتیجہ رہا۔ ہم نے ریاستی حکومت سے درخواست کی ہے وہ اپنے کسی افسر کو بھوک ہڑتال پر بیٹھے نوجوان ڈکٹروں سے بات چیت کرنے کے لئے بھیجے اور اعلیٰ افسر کو ترجیح دے۔ حالانکہ، چیف سکریٹری نے اشارہ دیا ہے کہ وہ کوئی مقررہ تاریخ نہیں بتا سکتے۔‘‘

بعد میں نامہ نگاروں سے بات کرتے ہوئے منوج پنت نے کہا کہ انہوں نے بنگال ڈاکٹرز فورم کے نمائندوں سے گزارش کی تھی کہ اپنے جونیئر ساتھیوں سے فوری طور پر بھوک ہڑتال ختم کرنے کے لئے کہے۔ پنت نے مزید کہا کہ ’’ہم نے ان سے تفصیلی گفتگو کی جو تقریباً ڈھائی گھنٹے تک چلی۔ بہت سارے خدشات اٹھائے گئے جس کا ہم نے نوٹس لیا۔ جونیئر ڈاکٹروں کے مطالبات کے حوالے سے ہم نے تفصیل سے بات کی۔ ان کے مجموعی طور پر 10 مطالبات تھے جس میں سے 7 مطالبات پورے کیے جا چکے ہیں۔‘‘

منوج پنت نے اپنی بات جاری رکھتے ہوئے کہا کہ ’’تین مطالبات پورے کرنے کے لئے وہ (ڈاکٹرس) خاص وقت مقرر کرنے کی درخواست کر رہے تھے۔ یہ فیصلہ انتظامیہ کے تحت ہے، جس پر ریاستی حکومت کو غور کرنے کی ضرورت ہے۔ اس لئے ہم اس وقت کسی مخصوص وقت کا تعین نہیں کر سکتے۔ ہم نے انہیں یہ یقین دلایا ہے کہ ہم نے ان کے مسائل اور شکایات کا نوٹس لے لیا ہے۔ ہم نے ان سے درخواست کی ہے کہ وہ جونیئر ڈاکٹروں کو بھوک ہڑتال ختم کرنے پر راضی کریں، کیونکہ ہم ان کی صحت و سالمیت کو لے کر فکر مند ہیں۔‘‘