کاروار 4 / جولائی (ایس او نیوز) پوری ریاست میں تیز برسات کی وجہ سے ندیوں اور دریاوں میں پانی کی مقدار میں غیر معمولی اضافے کے ساتھ  بہاو تیز ہوگیا ہے جس سے مختلف مقامات پر عام زندگی کا نظام درہم برہم ہوگیا ہے ۔
    
ضلع اتر کنڑا میں بھی تیز بارش کی وجہ سے ندیوں میں سیلابی کیفیت پیدا ہوگئی ہے اور الگ الگ مقامات پر پانی جمع ہونے، ٹریفک کا نظام اور عام زندگی کے معمولات متاثر ہونے کی خبریں مل رہی ہیں ۔ 
    
اسی دوران کرناٹکا پاور کارپوریشن (کے پی ٹی سی ایل) نے سیلاب کے خطرے کو محسوس کرتے ہوئے ضلع میں ندی کنارے بسنے والوں کو چوکنا رہنے کی ہدایات جاری کی ہیں ۔ کالی ندی کے کانیری ڈیم کے اندر بہنے والے پانی کی سطح بڑھ جانے کی وجہ سے آبی ذخیرے کے تحفظ کے لئے کسی بھی وقت پانی کا اخراج شروع کرنے کا امکان ہے اور اس کی وجہ علاقے میں سیلاب کا خدشہ ظاہر کیا گیا ہے ۔ اس کے پیش نظر اپر کانیری آبی ذخیرے کے اطراف بسنے والوں کو محفوظ مقامات کی طرف منتقل ہونے کی ہدایت جاری کی گئی ہے ۔ خطرے کی زد میں آنے والے علاقے کے لوگوں کو اپنے مویشی اور مال و اسباب کے ساتھ دوسری جگہ منتقل ہونے کو کہا گیا ہے ۔