واشنگٹن، 20/اکتوبر(ایس او نیوز /ایجنسی ) امریکی وزیر دفاع لائیڈ آسٹن نے بیان دیا ہے کہ امریکہ چاہتا ہے کہ اسرائیل لبنان کے دارالحکومت بیروت اور اس کے اطراف میں ہونے والے حملوں کو کم کرے۔ آسٹن نے مزید کہا کہ "شہریوں کی ہلاکتوں کی تعداد کافی زیادہ ہو چکی ہے۔ ہم اسرائیل سے توقع رکھتے ہیں کہ وہ بیروت اور اس کے ارد گرد حملوں میں کمی لائے، اور ہم مذاکرات کی طرف بڑھنے کی امید رکھتے ہیں تاکہ دونوں طرف کے شہری اپنے گھروں کو واپس جا سکیں۔"

انہوں نے انکشاف کیا کہ انہوں  نے جنوبی لبنان میں اقوام متحدہ کی امن فوج ’یونیفل‘ کی سکیورٹی کا مسئلہ اسرائیلی وزیر دفاع یوآو گیلنٹ کے ساتھ اٹھایا۔ انہوں نے کہا کہ "اسرائیل نے مجھے بتایا کہ حالیہ دنوں میں ہونے والے متعدد واقعات کے باوجود اقوام متحدہ کی فورس کو نشانہ بنانے کا کوئی ارادہ نہیں ہے"۔

ایک اور تناظر میں امریکی وزیر دفاع نے کہا کہ "غزہ کے شہریوں کو وہ انسانی امداد ملنی چاہیے جو انہیں زندہ رہنے کے لیے درکار ہےاور اس کا زیادہ حصہ ان تک پہنچنا چاہیے"۔ان کا یہ بیان ایسے وقت میں سامنے آیا ہے جب جی7 ممالک کے وزرائے دفاع نے لبنان میں اقوام متحدہ کی عبوری فورس ’یونیفل‘ اور لبنانی مسلح افواج کے لیے اپنی حمایت کا اظہار کیا۔ گروپ کے وزرائے دفاع کی پہلی میٹنگ کے بعد منظور کی گئی مشترکہ دستاویز اس بات کی نشاندہی کرتی ہے کہ امن دستوں کا تحفظ تنازع کے تمام فریقوں کی ذمہ داری ہے۔

دستاویز کے متن میں کہا گیا ہے کہ "ہم لبنان-اسرائیل سرحد پر سلامتی اور استحکام کی بحالی کی حمایت کرتے ہیں، جس میں مقامی آبادی کا تحفظ بھی شامل ہے۔ ہم لبنان میں ہونے والی حالیہ پیش رفت اور مزید کشیدگی کے خطرے کے بارے میں بھی اپنی تشویش کا اظہار کرتے ہیں۔ ہم اقوام متحدہ کی سلامتی کونسل کی قرارداد نمبر 1701 کے مکمل نفاذ کے مطابق دشمنی کے مکمل خاتمے کا مطالبہ کرتے ہیں۔