الہ آباد، 14/نومبر (ایس او نیوز /ایجنسی)اتر پردیش کے شہر الہ آباد (پریاگراج) میں یو پی پی ایس سی (اتر پردیش پبلک سروس کمیشن) کے امیدواروں کا احتجاج اس وقت شدت اختیار کر گیا جب پولیس نے مظاہرہ کر رہے طلباء کو زبردستی گرفتار کر لیا۔ رپورٹ کے مطابق، پولیس کے سادہ لباس میں آنے اور مظاہرین کو گھسیٹ کر لے جانے کی وجہ سے طلباء میں افرا تفری مچ گئی۔ ایک طالبہ نے بتایا کہ پولیس نے خواتین مظاہرین کے ساتھ بھی بدسلوکی کی۔ ویڈیو میں دکھایا گیا کہ پولیس نے کچھ طلباء کو گھسیٹتے ہوئے اپنے ساتھ لے جایا، جس کے بعد یہ ویڈیو سوشل میڈیا پر وائرل ہو گئی۔

اس سے پہلے بدھ کے روز پولیس نے 11 طلباء کو حراست میں لیا تھا جو کوچنگ سینٹر کی لائبریری کو زبردستی بند کروا رہے تھے۔ پولیس نے ان پر ماحول خراب کرنے کی دفعات کے تحت چالان کیا۔ اس کے باوجود طلباء کی بڑی تعداد مظاہرہ جاری رکھے ہوئے ہے۔

طلباء کا احتجاج یو پی پی ایس سی کی ’پی سی ایس پری‘ اور ’آر او اے آر او‘ کے امتحانات کو دو دن میں کرانے کے خلاف ہے۔ طلباء کا کہنا ہے کہ یہ امتحانات ایک ہی دن اور ایک ہی شفٹ میں کیے جائیں تاکہ نارملائزیشن کے اثرات سے بچا جا سکے۔ یہ طلباء کی اہم شکایت ہے کہ دو دنوں میں امتحان ہونے سے نارملائزیشن کے ذریعے ان کے سکور میں کمی آ سکتی ہے۔

نرملائزیشن سسٹم اس وقت استعمال ہوتا ہے جب کسی امتحان میں سوالات کی سطح مختلف ہو۔ اس سسٹم کے ذریعے ہر پیپر کی پیچیدگی کو مدنظر رکھتے ہوئے امیدواروں کے نمبر متعین کیے جاتے ہیں۔

طلباء پر پولیس ایکشن کے بعد اپوزیشن کی جانب سے سخت ردعمل آیا ہے۔ کانگریس نے اپنے ٹوئٹر پر لکھا، ’’یو پی کے پریاگراج میں بی جے پی حکومت طلباء کے احتجاج کو کچلنے کی کوشش کر رہی ہے۔ پولیس کے ذریعے طلباء کے ساتھ جو سلوک کیا گیا، وہ انتہائی شرمناک ہے۔ طلباء کا مطالبہ جائز ہے اور انہیں سنا جانا چاہیے۔‘‘