ہوناور 28 جون (ایس او نیوز) تعلقہ کے نگر بستی کیری میں ایک راہ چلتی بائک پر راستہ کنارے واقع ایک بڑا درخت گر پڑا، جس کی زد میں بائک پر سوار شوہر اور بیوی آگئے۔ واردات جمعہ کی دوپہر کو پیش آئی۔
بائک سوار بابو نائک (52) جو ہوناور تعلقہ کے انل گوڈا کا رہنے والا ہے، حادثے میں زخمی ہوگیا، البتہ بائک کی پچھلی سیٹ پر سوار بھاگیرتی نائک بال بال بچ گئی۔ پتہ چلا ہے کہ یہ دونوں نگر بستی کیری میں اپنے رشتہ دار کی آخری رسومات میں شریک ہونے کے بعد واپس اپنے گھر لوٹ رہے تھے جس کے دوران یہ حادثہ پیش آیا۔
درخت ان کی بائک پر گرتا دیکھ کر اسی راستے سے گذرنے والے دیگر بائک سوار فوری ان کی مدد کے لئے پہنچ گئے۔ چونکہ بجلی کی تار بھی درخت کی زد میں آگئی تھی، لوگوں نے کافی سنبھل کر راحت اور بچاو کا کام کرتے ہوئے پہلے ٹہنیوں کو ہٹاکر بھاگیرتی کو باہر نکلنے میں مدد کی، پھر بابو نائک کو باہر نکالا۔
اس دوران اسی راستے سے بذریعہ کار گذرنے والے بھٹکل کے بی جے پی لیڈر گوند نائک، شری کانت نائک اور گنپتی گوڈا بھی مدد کے لئے آگے بڑھے اور بچاو کا کام کرتے ہوئے زخمی بائک سوار کو اسپتال پہنچانے میں مدد کی۔