گوکرن کے قریب سیاحوں کی بوٹ ڈوب گئی۔ تمام 42 مسافروں کو بحفاظت بچا لیا گیا
گوکرن 20/مئی (ایس او نیوز) اُترکنڑا کے مشہور سیاحتی مقام گوکرن کے قریب سیاحوں کو سمندری سیر کے لئے لے جانے والی بوٹ اچانک ڈوب جانے سے کچھ دیر کے لئے پورے علاقہ میں ہلچل مچ گئی، لیکن خوش قسمتی سے تمام سیاحوں کو بچالیا گیا۔ واردات اتوار شام کو پیش آئی۔ پتہ چلا ہے کہ بوٹ پر 42 سیاح سوار تھے، جب بوٹ ڈوبنے لگی تو سیاح بھی پانی میں ڈوبنے لگے، مگر قریب میں موجود دوسری بوٹ کے ذریعے انہیں بچالیا گیا، کوسٹ گارڈ پولس کی بوٹ بھی فوری جائے وقوع پر پہنچ گئی ، جبکہ بعض سیاح تیرتے ہوئے ساحل کنارے پہنچنے میں کامیاب ہوگئے۔
یہ تو اچھا ہوا کہ بوٹ ساحل کے قریب ہی ڈوب گئی ، جس سے فوری بچاؤ ممکن ہوا اور ممکنہ تباہی سے بچا یا گیا۔ حیدرآباد، تلنگانہ، مہاراشٹرا اور ہاسن کے سیاحوں بشمول خواتین، بچے اور نوجوان اس بوٹ پر سوار تھے، بوٹ ڈو ب جانے سے ان کے موبائل اور دیگر قیمتی سامان سمندر میں ہی بہہ گئے۔
گوکرن پولیس انسپکٹر یوگیش کے ایم۔ اور اس کا عملہ سمیت کوسٹ گارڈ کے پی ایس آئی انوپ نائک اور ان کی ٹیم کے اہلکار جائے وقوعہ پر موجود تھے۔
اتوار کا دن ہونے کی وجہ سے سیاحوں کی بڑی تعداد سمندر کی سیر کے لیے آئی ہوئی تھی۔ انہوں نے ہاف مون بیچ اور دیگر مقامات کا دورہ کرنے اور بوٹ کے ذریعے پانی کے مختلف کھیلوں اور سرگرمیوں سے لطف اندوز ہونے کے لئے تڈری کے گنیش رمیش موڈنگی کی بوٹ پر سوار ہوئے تھے۔
میڈیا سے بات کرتے ہوئے کوسٹ گارڈ کے پی ایس آئی انوپ نائک نے بتایا کہ وہ مسافروں کے بیانات کی بنیاد پر تحقیقات کریں گے اور شکایت درج کرتے ہوئے مناسب کارروائی کریں گے۔
واقعے پر مقامی لوگوں نے تشویش کا اظہار کیا ہے، مقامی لوگوں کا کہنا ہے کہ علاقے میں سیاحوں کو سیر کرانے والی بوٹ مناسب اجازت یا حفاظتی اقدامات کے بغیر چلتی ہیں۔ انہوں نے متعلقہ حکام پر زور دیا ہے کہ وہ سیاحوں کی حفاظت کو یقینی بنانے کے لیے مناسب کارروائی کریں۔
