جئے پور 25/نومبر (ایس او نیوز) راجستھان میں اسمبلی انتخابات  کے لیے ووٹنگ کے درمیان سنیچر کو سیکر کے فتح پور شیخاوٹی میں دو گروپوں کے درمیان تشدد کا واقعہ پیش آیا ہے۔ بتایا جا رہا ہے کہ بوچیوال بھون کے پیچھے واقع محلے میں دو گروپوں میں کشیدگی کے بعد پتھربازی   شروع ہوگئی۔ واقعہ کی جانکاری ملنے کے بعد  سیکوریٹی میںاضافہ کیا گیا ہے اور زائد پولس  فورس جائے وقوع پر پہنچ چکی ہے۔

پتھراؤ کی وجہ سے پورے محلے میں کشیدگی پائی جارہی ہے۔بتایا گیا ہے کہ پتھراو کی واردات  کے سبب کچھ دیر کے لیے ووٹنگ کا عمل بھی متاثر ہوا، لیکن جلد ہی حالات کو قابو میں کر لیا گیا۔ امن و امان برقرار رکھنے کے لیے محلے میں پولیس فورس کی تعیناتی کر دی گئی ہے۔ پولیس کے کئی بڑے افسران بھی موقع پر موجود ہیں۔

میڈیا رپورٹوں کے کے مطابق بوچیوال بھون پولنگ بوتھ پر فرضی ووٹنگ کو لے کر پہلے دو فریقین میں تنازعہ شروع ہوا۔ اس کے بعد کانگریس امیدوار حاکم علی خاں و آزاد امیدوار مدھوسودن بھنڈا کے حامی آمنے سامنے آ گئے اور ایک دوسرے پر پتھراؤ کرنے لگے۔ دونوں فریقین میں تقریباً نصف گھنٹے تک پتھراؤ ہوتا رہا۔ اس درمیان کئی لوگوں کو حراست میں بھی لیا گیا ہے۔ فی الحال حالات پُرامن بتائے گئے ہیں۔

یاد رہے کہ راجستھان میں  3/ ڈسمبر کو ووٹوں کی گنتی ہوگی اوراسی دوپہر تک نتائج سامنے آئیں گے۔