چنئی، 12/اکتوبر (ایس او نیوز /ایجنسی) جمعہ کے روز تمل ناڈو کے کاورائی پٹئی میں میسور سے دربھنگہ جانے والی بھاگ متی ایکسپریس ایک مال گاڑی سے ٹکرا گئی، جس کے نتیجے میں 12 ڈبے پٹری سے اتر گئے۔ حادثے کے بعد 18 ٹرینیں منسوخ کر دی گئیں، جبکہ راحت رسانی کے کام کی وجہ سے متعدد ٹرینوں کا رخ موڑ دیا گیا ہے۔ انڈین ریلوے نے اس حادثے کی اعلیٰ سطحی تحقیقات کا حکم دیا ہے اور نیشنل انویسٹی گیشن ایجنسی (این آئی اے) بھی حادثے کی وجوہات جاننے کے لیے تفتیش کر رہی ہے۔

حکام یہ جاننے کی کوشش کر رہے ہیں کہ سگنل کی خرابی کے سبب یہ حادثہ پیش آیا تھا یا یہ جان بوجھ کر کی جانے والی حرکت تھی کیونکہ مسافر بردار ٹرین ۸۰؍ کلومیٹر فی گھنٹہ کی رفتار سے سفر کر رہی تھی اور مال گاڑی سے ٹکرائی تھی۔

ٹرینوں کی خدمات جاری کرنے کیلئے بحالی کا کام جاری ہے۔ ریلوے کے حکام نے آج صبح یہ اعلان کیا ہے کہ جانی نقصان کی کوئی اطلاع نہیں ہے۔ میسور دردربھنگہ بھاگ متی ایکسپریس کے ۶؍ ڈبے پٹری سے اترے تھے جن میں سے تین میں آگ لگی تھی۔ وزارت ریلوے نے اب تک اس حادثے کے نتیجے میں ہونے والی اموات کی کل تعداد نہیں بتائی ہے۔ تمل ناڈو کی پولیس نے کہا ہے کہ یہ تصادم اس وقت ہوا تھا جب مسافر بردارٹرین لوپ لائن میں داخل ہوئی تھی اور مسافر بردارٹرین سے ٹکرائی تھی۔حادثے کی اطلاعات ملنے کے فوراً بعد ہی راحتی ٹیمیں جائے حادثہ پر پہنچا دی گئی تھیں۔ حالات کو قابو کرنے کیلئے جدوجہد جاری ہے۔ 

راہل گاندھی نے اس معاملے کے تعلق سے کہا ہے کہ ’’میسور دربھنگہ ٹرین حادثہ نے بالاسور ٹرین حادثہ کی یاد دلا دی ہے جہاں ایک مسافربردار ٹرین مال گاڑی سے ٹکرائی تھی۔ اس طرح کے حادثات میں کئی جانوں کے نقصانات ہونے کے باوجود، کوئی کارروائی نہیں کی جاتی۔ یہاں سب سے پہلے جوابدہی قبول کرنی چاہئے۔ حکومت کی آنکھیں کھلنے سے پہلے کتنے لوگوں کو اپنی جانیں گنوانی ہوں گی۔‘‘