سرسی 28 / جون (ایس او نیوز) جنگلاتی زمین پر بسنے والوں کے مسائل کو متعلقہ محکمہ کے علم میں لانے کے لئے سرسی میں 'آرنیہ واسی عدالت' کا کامیاب انعقاد ہوا جس میں افسران نے عدالت کو بتایا کہ  جنگل واسیوں کو محکمہ کی  طرف سے کوئی تکلیف نہیں دی جائے گی ۔

    سرسی ژون کے اسسٹنٹ کنزرویٹر آف فوریسٹ اجّیّا، ڈانڈیلی کالی ٹائیگر پروجیکٹ آفیسر نتیش کمار اور اسسٹنٹ کنزرویٹر عزیز کی موجودگی میں جنگل واسیوں کے حقوق کے لئے جد و جہد کرنے والی کمیٹی کے صدر رویندرا نائک کی قیادت میں سرسی میں واقع چیف کنزرویٹر آف  فوریسٹ کے دفتر  میں یہ عدالت منعقد کی گئی ۔ 

عدالت میں شریک ہونے کے لئے ضلع بھر سے تشریف لائے ہوئے ہوراٹا سمیتی کے کارکنان نے محکمہ جنگلات کے نچلی سطح کے عملے کی طرف سے جنگل واسیوں کے ساتھ کی جا رہی زیادتیوں پر اپنی ناراضگی کا اظہار کیا اور بتایا کہ عملے کے کچھ افراد مالدار جنگل واسیوں کے لئے ایک پیمانہ اور غریب جنگل واسیوں کے لئے دوسرا پیمانہ استعمال کرتے ہیں ۔ عدالت کے شرکاء نے اس بات پر بھی ناراضگی جتائی کہ جنگلی ہاتھی، بندر اور دوسرے جانور ان کی فصلوں کو تباہ کر رہے ہیں اور اسے روکنے کے لئے محکمہ جنگلات کے افسران کوئی اقدام نہیں کرتے ۔ 

    عدالت کے دوران جنگلاتی افسران کی طرف سے زمین کے جی پی ایس سروے، فصلوں کو نقصان پہنچانے، جی پی ایس کے لئے عرضی دینے والوں کو بلا وجہ ہراساں کرنے اور مقدمے دائر کرنے،  زمین خالی کروانے جیسے مسائل پر تشفی بخش جوابات دئے گئے ۔