ٹی20 ورلڈکپ: جنوبی افریقہ پہلی بار فائنل میں پہنچ گیا
ٹرینیڈاڈ ، 27/ جون (ایس او نیوز /ایجنسی)آئی سی سی ٹی 20 ورلڈ کپ کے پہلے سیمی فائنل میں جنوبی افریقہ نے افغانستان کو 9 وکٹوں سے شکست دے کر پہلی بار میگا ایونٹ کے فائنل مٰں جگہ بنا لی ہے۔
جنوبی افریقہ نے افغانستان کا 56 رنز کا آسان ہدف 8.5 اوورز میں ایک وکٹ کے نقصان پر حاصل کر لیا۔ پروٹیز کے کوئنٹن ڈی کوک واحد بیٹر تھے جو 5 رنز بنا کر آؤٹ ہوئے، ہینڈرکس 29 اور کپتان ایڈن مارکرام 23 رنز بنا کر ناٹ آؤٹ رہے۔
جنوبی افریقہ کی گرنے والی واحد وکٹ فضل حق فاروقی نے حاصل کی۔
ٹرینیڈاذ کے برائن لارا اسٹیڈم میں میگا ایونٹ کے اس پہلے سیمی فائنل میں افغانستان نے ٹاس جیت کر پہلے بیٹنگ کا فیصلہ کیا، افغانستان کی پوری ٹیم 11.5 اوورز میں صرف 56 رنز بنا کر آؤٹ ہو گئی۔
پروٹیز بولرز کی عمدہ بولنگ کے سامنے کسی افغانی بیٹر کا بلا چل نہ سکا، افغانستان کے عظمت اللہ عمر زئی واحد بیٹسمین تھے جو ڈبل فیگر میں داخل ہوئے انہوں نے 10 رنز بنائے۔ جبکہ تین کھلاڑی صفر پر پویلین لوٹ گئے۔ رحمان اللہ گرباز صفر، ابراہیم زردان 2، گلبدین نائب 9، محمد نبی صفر اور خروٹے صرف 2 رنز بنا سکے، کریم جنت اور راشد خان نے 8،8 رنز بنائے، نور احمد صفر اور نوین الحق نے 2 رنز بنائے۔
جنوبی افریقہ کی جانب سے تبریز شمسی اور مارکو جینسن نے 3،3 کھلاڑیوں کو آؤٹ کیا، رباڈا اور اینرچ نے 2،2 وکٹیں حاصل کیں۔