منگلورو ، 9 / جون (ایس او نیوز) ساحلی پٹی پر مانسوں کی رفتار بہت ہی زیادہ تیز ہوگئی ہے اور اس کے نتیجے میں اتر کنڑا کے علاوہ اڈپی ضلع ، دکشن کنڑا اور کاسرگوڈ ضلع میں بہت ہی زیادہ پانی برسا ہے ۔ سمجھا جا رہا ہے کہ برسات کی یہی رفتار اگلے کچھ دنوں تک یونہی جاری رہے گی ۔ اسی پس منظر میں محکمہ موسمیات نے پوری ساحلی پٹی پر ریڈ الرٹ جاری کیا ہے ۔
    
دکشن کنڑا کے منگلورو سمیت دھر مستھلا، سبرامنیا، بنٹوال، سولیا، چارمڈی، اجیرے، اپن انگڈی، الال، مولکی سورتکل، پتور، کئی شہروں میں تیز برسات ہوئی اور کئی مقامات پر سڑکوں اور نشیبی علاقوں میں سیلابی کیفیت  پیدا ہوگئی ۔ 
    
اڈپی ضلع کے مختلف مقامات پر گزشتہ دو دنوں سے ہو رہی بھاری برسات کی وجہ سے سات سے زیادہ گھروں کو نقصان پہنچا ہے ۔
    
موصولہ رپورٹ کے مطابق کنداپور تعلقہ کے کمل شیلے گرام میں بجلی گرنے سے ایک گھر کو جزوی نقصان پہنچا جبکہ بقیہ گھروں کو تیز ہواوں کی وجہ سے درختوں کے گرنے سے جزوی نقصان پہنچا ہے ۔  
    
بیندور میں اسکول کے اندر پانی : اڈپی ضلع کے بیندور میں راہوتناکٹّٰے نامی مقام  پر گزشتہ رات برسی ہوئی تیز بارش کی وجہ سے ہر جگہ پانی جمع ہو گیا یہاں تک کہ سرکاری اسکول کے کلاس روم اور ہیڈ ماسٹر کے آفس کے اندر پانی گھس گیا ۔ عوام کا کہنا ہے کہ راہوتناکٹّٰے کے نشیبی علاقے میں اس طرح برسات کا پانی جمع ہونے اور اسکول کے اندر گھسنے کی سب سے بڑی وجہ نیشنل ہائی وے 66 کا فورلین تعمیراتی منصوبہ ہے کیونکہ یہاں برساتی پانی کی نکاسی کے لئے سڑک کے کنارے نالیوں کا مناسب انتظام نہیں کیا گیا ہے ۔
    
مقامی لوگوں کی طرف سے مطالبہ کیا جا رہا ہے کہ اس مسئلے کے حل کے لئے متعلقہ سرکاری افسران کو فوراً مداخلت کرنی چاہیے اور برسات کے موسم میں پانی کو سڑکوں اور نشیبی علاقوں میں جمع ہونے اور گھروں اور اسکول کی عمارت سے گھسنے سے روکنے کے لئے برساتی پانی کی نکاسی کا رخ یہاں سے تقریباً دو سو میٹر کی دوری پر بہہ رہی سومناوتی ندی کی طرف موڑ دینا چاہیے ۔ 
    
ملپے ساحل پر سیاحوں کے لئے پابندی :مانسون کی شروعات کے ساتھ سمندر میں اچھال آنے اور تیز لہروں کو دیکھتے ہوئے ضلع انتظامیہ نے ملپے ساحل پر حفاظتی بندوبست سخت کر دیا ہے اور سیاحوں کے سمندر میں اترنے پر پابندی عائد کر دی ہے ۔ 
    
کسی بھی حادثے کو ٹالنے اور سیاحوں کی حفاظت کے پیش نظر ساحلِ سمندر پر تقریباً ایک کلو میٹر لمبی اور سات فٹ اونچی جالی کی باڑ لگا دی گئی ہے تاکہ سیاح کسی بھی حالت میں سمندری موجوں کے قریب نہ جا سکیں ۔ اس کے علاوہ ساحل پر کئی جگہ سیاحوں کو خطرے سے آگاہ اور چوکنا کرنے والے جھنڈے  اور بورڈ لگا دئے گئے ہیں ۔