بھٹکل میں ایس ڈی پی آئی کا احتجاجی مظاہرہ؛ مظاہرین نے کہا؛ سنگھ پریوارکی طرف سے پھیلائی جارہی ہے نفرت؛ جل رہا ہے پورا ملک
بھٹکل 4/اگست (ایس او نیوز) منی پورمیں عیسائیوں اورہریانہ میں مسلمانوں کے خلاف تشدد کی وارداتوں سمیت مہاراشٹرا میں ریلوے پولس اہلکار کے ذریعے تین مسلمانوں سمیت چار بے گناہوں کے قتل کی سخت مذمت کرتے ہوئے سوشیل ڈیموکریٹک پارٹی آف انڈیا (ایس ڈی پی آئی) نے بھٹکل سرکیوٹ ہاوس کے باہراحتجاجی مظاہرہ کیا اور بی جے پی اور آرایس ایس مخالف نعرے لگائے۔
مظاہرین سے خطاب کرتے ہوئے ایس ڈی پی آئی کے ضلعی صدرمحمد توفیق بیری نے کہا کہ سنگھ پریوارکی طرف سے پھیلائی گئی نفرت کے نتیجہ میں پورا ملک جل رہا ہے۔ منی پور کا فساد تھما بھی نہیں ہے، ہریانہ میں فرقہ وارانہ تشدد برپا کیا گیا، ایسے میں مہاراشٹرا میں ایک آرپی ایف جوان نے ٹرین کے اندراپنے ہی افسرسمیت تین مسلم بے گناہوں کو گولی مارکرشہید کردیا۔ سنگھ پریوار پورے ملک میں نفرت پھیلارہا ہے، جس کے نتیجے میں ملک کے مختلف حصوں میں بھی تشدد پھیل رہا ہے۔ توفیق بیری نے بتایا کہ بی جے پی اورسنگھ پریوارکی نفرت کی سیاست سے ملک میں ایسی صورتحال پیدا ہوئی ہے۔
توفیق بیری نے کہا کہ ایس ڈی پی آئی ان تمام واقعات کی مذمت میں ریاست بھرمیں احتجاجی مظاہرے کررہی ہے اوراس طرح کے واقعات کو روکنے کا مطالبہ کرتی ہے۔ انہوں نے بتایا کہ تشدد اور فرقہ وارانہ نفرت بی جے پی پارٹی کا ایک سیاسی ہتھیار ہے۔ یہی وجہ ہے کہ مودی کی قیادت والی حکومت نے منی پور میں امن بحال کرنے کے لیے تھوڑی سی بھی کوشش نہیں کی، حالانکہ یہ ریاست تین ماہ سے جل رہی ہے۔
توفیق بیری نے ہریانہ میں ایک مسجد کونذرآتش کرنے اورمسجد کے امام کو شہید کرنے کی واردات کے لئے بھی سنگھ پریوار کو ذمہ دارٹہرایا۔ جہاں جملہ چھ لوگوں کی موت ہوئی ہے۔
توفیق بیری نے کہا کہ یہ ایک المیہ ہے کہ پورے ملک میں پھیلا ہوا نفرت کا زہرریلوے سیکیورٹی اہلکاروں کے سروں پر بھی چڑھ گیا ہے۔ یہی وجہ ہے کہ ایک جوان نے گولیاں چلا کر چار بے گناہوں کو موت کے گھاٹ اتارا تو دوسرے اہلکاروں اور افسروں نے اسے بچانے کی پوری کوشش کرڈالی کہ اس کا دماغی توازن ٹھیک نہیں ہے۔قتل عام کے بعد سپاہی کے کہے گئے الفاظ سے یہ واضح ہوتا ہے کہ ملک میں سنگھ پریوار کے ساتھ ساتھ گودی میڈیا کے ذریعے جو نفرت پھیلائی جارہی ہے، وہ اپنا اثر دکھا رہی ہے۔ توفیق بیری نے کہا کہ ایس ڈی پی آئی ایسے تمام واقعات کی پرزور مذمت کرتی ہے۔ اور ایسی حرکتوں کے ذمہ داروں کے خلاف سخت کارروائی کا مطالبہ کرتی ہے۔
ایس ڈی پی آئی کے محمد لئیق نے استقبال کرتے ہوئے آخرمیں شکریہ ادا کیا۔ ایس ڈی پی آئی کے جنرل سکریٹری امان اللہ، میڈیا انچارج عبدالسمیع شیخ، اسمبلی صدر ثاقب شیخ، جنرل آرگنائزنگ سکریٹری زین، تنویرباشہ ودیگر کئی اراکین موجود تھے۔
