راجستھان ضمنی انتخاب: ایس ڈی ایم پر حملے کے بعد فرار آزاد امیدوار نریش مینا گرفتار
جئے پور، 14/نومبر (ایس او نیوز /ایجنسی) راجستھان کے ٹونک ضلع میں دیولی-اونیارا اسمبلی حلقے کے ضمنی انتخابات کے دوران آزاد امیدوار نریش مینا کے پرتشدد رویے کے باعث گاؤں سمراوتا میں کشیدگی پھیل گئی۔ اطلاعات کے مطابق نریش مینا نے ایس ڈی ایم کو تھپڑ مارا، جس کے بعد حالات بگڑ گئے۔ بدھ کی رات سے پولیس نے نریش مینا کی گرفتاری کے لیے کارروائی شروع کی، تاہم وہ فرار ہونے میں کامیاب ہو گیا تھا۔ جمعرات دوپہر کو پولیس نے بالآخر اسے گرفتار کر لیا۔
یہ واقعہ اُس وقت پیش آیا جب حلقے میں ووٹنگ کے دوران کشیدگی بڑھ گئی اور ہنگامہ رات بھر جاری رہا۔ گاؤں کے لوگوں میں غصہ بڑھتا گیا اور انہوں نے پولنگ پارٹیوں کو روکنے کی کوشش کی۔ جب پولیس نے مداخلت کی تو لوگوں نے پتھراؤ کیا جس کے جواب میں پولیس نے آنسو گیس کا استعمال کیا۔ مشتعل لوگوں نے سرکاری املاک کو نقصان پہنچایا اور ایس پی وکاس سانگوان کی گاڑی بھی توڑ دی گئی۔
بدھ کی رات 9 بجے پولیس نے نریش مینا کو گرفتار کیا لیکن اس کے حامیوں نے ہنگامہ کر کے پولیس حراست سے رہا کرا لیا۔ جمعرات صبح نریش مینا دوبارہ سمراوتا گاؤں میں نمودار ہوا اور پولیس پر الزامات لگائے۔ اس کے بعد اس نے رضاکارانہ گرفتاری کی پیشکش کی، اور پولیس نے دوپہر کو دوبارہ اُسے گرفتار کرلیا۔
پولیس نے صورتحال کو کنٹرول کرنے کے لیے بدھ رات گاؤں میں کریک ڈاؤن کیا جس کے نتیجے میں 60 افراد کو گرفتار کیا گیا۔ اطلاعات کے مطابق اس جھڑپ میں 50 سے زائد افراد زخمی ہوئے، جن میں گاؤں کے رہائشی اور پولیس اہلکار شامل ہیں۔
