بھٹکل میں کار اور بائک کی ٹکر؛ بائک سوار جاں بحق ، دوسرا زخمی
بھٹکل 8 مئی (ایس او نیوز) بائک اور کار کی ٹکر میں بائک سوار حسام الدین شریف (30) کی موت واقع ہوگئی جبکہ بائک کی پچھلی سیٹ پر سوار محمد قطب (20) زخمی ہوگیا جسے کنداپور اسپتال لے جایا گیا ہے۔ حادثہ ساگر روڈ پر پیر شام قریب 5:30 بجے پیش آیا۔
اطلاع کے مطابق تین بائک پر سوار چھ دوست پیر شام کو تفریح کی غرض سے ساگر روڈ گئے تھے، واپسی کے دوران کنداپور کی ایک ٹورسٹ کار ان میں سے ایک بائک سے ٹکراگئی۔ ٹکر لگتے ہی بائک پر سوار دو نوجوان شدید زخمی ہوگئے ۔ دونوں کو فوری طور پر قریبی اسپتال لے جایا گیا، جہاں سے زائد علاج کے لئے ایک کو کنداپور اوردوسرے کو اُڈپی روانہ کیا گیا۔ پتہ چلا ہے کہ حسام الدین نامی نوجوان اُڈپی اسپتال پہنچنے تک داعی اجل کو لبیک کہہ گیا۔ انا للہ و اناالیہ راجعون
حسام الدین کی میت اُڈپی اسپتال سے بھٹکل لانے کے لئے کاغذی کاروائی جاری ہے، جبکہ کنداپور اسپتال میں ایڈمٹ محمد قطب کے پاوں کو چوٹ لگی ہے اور اس کا وہیں پر علاج کیا جارہا ہے۔ حسام الدین بھٹکل نوائط کالونی کے عثمانیہ کالونی کا رہائشی ہے، جبکہ محمد قطب کارگیدے کا رہنے والا ہے۔
