حیدرآباد 7 ڈسمبر (ایس او نیوز) تلنگانہ کانگریس کے صدر ریونت ریڈی، جنہوں نے ۳۰؍ نومبر کو تلنگانہ اسمبلی انتخابات میں کلیدی کردار ادا کیا تھا آج تلنگانہ کے دوسرے وزیر اعلیٰ کے طور پر حلف اُٹھایا۔ ان کی حلف برداری کی تقریب حیدرآباد میں لال بہادر شاستری اسٹیڈیم میں منعقد کی گئی تھی جہاں انہیں تلنگانہ کی گورنر تاملیسائی سوندرراجن نے عہدے کا حلف دلایا۔

ریونت ریڈی کے وزیراعلیٰ بننےکے ساتھ ہی کانگریس جنوبی ہند کی دو ریاستوں میں برسراقتدار ہو گئی ہے۔ یاد رہے کہ اس سے قبل کرناٹک میں بھی کانگریس نے جیت درج کی تھی جہاں سدرامیا کی قیادت میں کانگریس کی حکومت ہے۔

ریونت ریڈی کو وزیراعلیٰ کا حلف دلانے کے ساتھ ساتھ ان کی کابینہ کے ۱۱؍ ممبران نے بھی حلف لیا جن میں مالو بھٹی وکرمارکا (جو نائب وزیر اعلیٰ منتخب کئےگئے ہیں) اور تلنگانہ کانگریس چیف این اُتم کمار ریڈی بھی شامل ہیں۔ باقی ۸؍ ممبران جو کابینہ میں شامل ہوئے ہیں ان میں سریدھر بابو، پونم پربھاکر، کوماتیریڈی وینکٹ ریڈی، دامودر راجنارسیما، پونگولیٹی سری نواس ریڈی، دانا انسویا، تملا ناگیشور راؤ، کونڈا سریکھا اور جوپلی کرشنا راؤشامل ہیں۔

اس تقریب میں سونیا گاندھی، راہل گاندھی اور پرینکا گاندھی کے علاوہ کانگریس کے صدر ملکار جن کھرگے، کرناٹک کے وزیر اعلیٰ سدارمیا اور نائب وزیر اعلیٰ ڈی کے شیور کمار بھی موجود تھے۔ 

یاد رہے کہ کانگریس نے 119 سیٹوں والی تلنگانہ اسمبلی میں 64 سیٹیوں پر جیت حاصل کی تھی، جن کے لیے انتخابات 30 نومبر کو ہوئے تھے، اس الیکشن میں حکمراں پارٹی بھارت راشٹرا سمیتی ریاست میں 39 سیٹوں پر ہی سمٹ  کر رہ گئی تھی جہاں وہ گزشتہ ایک دہائی سے حکومت کر رہی تھی۔