معروف کنڑا ادیب یوگیش ماسٹرکی سیرت پر لکھی کتاب کابھٹکل میں رسم اجراء؛ غیر مسلموں کے جم غفیرسے محمد کُنہی کا پُراثر خطاب
بھٹکل 5/نومبر (ایس او نیوز) دنیا میں لوگوں کوصحیح راہ دکھانے اور دینِ حق کی دعوت دینے کے لیے خدا نے الگ الگ زمانے میں،دنیا کے الگ الگ ملکوں، الگ الگ حصوں اور الگ الگ زبانوں میں ایک لاکھ سے زائد پیغمبر بھیجے، ان پیغمبروں میں آخری پیغمبرحضرت محمد ﷺ ہیں۔ حضرت محمد ﷺ کا سب سے بڑا کارنامہ یہ ہے کہ پیغمبرحضرت محمد ﷺ اس دنیا سے رخصت ہوئے ١٤٠٠ سال کا عرصہ گذرچکا ہے، لیکن آج بھی وہ خدا نہیں بنے، وہ انسانوں میں پیدا ہوئے اورانسان ہی بن کر رہے۔ دنیا میں دوسو کروڑ مسلمان ہیں اور حضرت محمد ﷺ کی ذات مسلمانوٓں کو اپنی جان سے بھی زیادہ عزیز ہے، لیکن دنیا کا کوئی بھی مسلمان حضرت محمد ﷺ کی پوجا نہیں کرتا، اُن کی عبادت نہیں کرتا۔ یہ بات جماعت اسلامی ہند کے کرناٹک سکریٹری محمد کُنہی نے کہی۔ بھٹکل میں جماعت اسلامی ہند کی طرف سے منعقدہ سیرت مہم میں مسلمانوں کے ساتھ غیرمسلمانوں کے ایک جم غفیر سے صدارتی خطاب کرتے ہوئے انہوں نے کہا کہ آج ہم ایک ایسے سماج میں رہتے ہیں جہاں کوئی بھی بڑا آدمی ملتا ہے تو لوگ اُسے اپنا خدا تسلیم کرتے ہوئے اُس کی پوجا کرنا شروع کردیتے ہیں۔ کوئی بھی اچھا اور کامیاب انسان ملتا ہے تو لوگ اُس کی راہ پر چلنے اور اُس کی باتوں پر عمل کرنے کے بجائے اُس کی پوجا ہی شروع کردیتے ہیں۔ انہوں نے کہا کہ خدا کے نام پر لوگوں کو بے وقوف بنانا پہلے بھی آسان تھا، آج بھی آسان ہے۔ خدا کے نام پر آج بھی انسانوں کو دھوکہ دینا عام بات ہے۔ لیکن حضرت محمد ﷺ نے انسانوں کو سکھایا کہ خالق کون ہے اور مخلوق کون ہے۔ پیغمبر نے سکھایا کہ عبادت اور پوجا صرف خالق کی کرنی ہے، مخلوق کی نہیں۔یہی وجہ ہے کہ مسلمان اپنے نبی کی پوجا نہیں کرتے، مسلمان صرف اپنے پیدا کرنے والے خدا کی عبادت کرتے ہیں۔
پروگرام میں معروف کنڑا ادیب یوگیش ماسٹر کی حضرت محمد؍ﷺ کی سیرت پر کنڑا میں لکھی کتاب ننّا اریوینا پروادی (پیغمبر میری نظر میں) کا مجلس اصلاح و تنطیم بھٹکل کے صدرعنایت اللہ شاہ بندری کے ہاتھوں اجراء کیا گیا۔ اس موقع پر کتاب کے ادیب یوگیش ماسٹربھی مہمان خصوصی کے طور پر موجود تھے، جنہوں نے اسلام کے تعلق سے اپنے خیالات کا اظہار کیا۔ انجمن انجیرنگ کالج کے پروفیسر آر ایس نائیک نے کتاب کے تعلق سے مُفصل معلومات فراہم کی۔
ہندو ۔مسلم گیٹ ٹوگیدر کے اس خوبصورت پروگرام کا آغاززید عرفان جوباپو کی تلاوت کلام پاک سے ہوا، پروگرام کے کنوینرمحمد رضامانوی نے قران کی آیات کا کنڑا میں ترجمہ پیش کرتے ہوئے پروگرام کی نظامت بھی سنبھالی۔ مینگلور سے تشریف فرما جماعت اسلامی ہند کے زونل کنوینر سعید اسماعیل نے جماعت اسلامی کا تعارف، خدمات اورپروگرام کی غرض وغایت پر روشنی ڈالی۔ بھٹکل تعلقہ ہیلتھ آفسر ڈاکٹر سویتا کامتھ نے بھی پروگرام میں اپنےتاثرات پیش کئے۔
سیرت پرمنعقدہ تحریری مقابلے میں اول، دوم اور سوم آنے والوں سمیت دس دیگر مسابقین کو بہترین تحریر پر تشجیعی انعامات سے نوازا گیا۔ اس موقع پر بھٹکل انجمن کے دو طلبہ محی الدین اصباح کھروری اور شریاس نائیک کو بالترتیب بی کام اور بی اے میں غیر معمولی کامیابی حاصل کرنے پر شال پوشی کرتے ہوئے تہنیت کی گئی۔
جماعت اسلامی ہند بھٹکل شاخ کے امیر مولانا ایس ایم زُبیر نےکلمہ تشکر پیش کیا۔ آخر میں پروگرام میں شریک تمام حاضرین کو بہترین تواضع کے بعد رخصت کیا گیا۔
Renowned writer Yogesh Master addresses seminar on Prophet Muhammed's legacy in Bhatkal
