نئی دہلی، 25/نومبر (ایس او نیوز /ایجنسی)ملک کی کئی ریاستوں میں سردی کی لہر نے دستک دے دی ہے اور شدید کہرے کے باعث لوگوں کو مشکلات کا سامنا کرنا پڑ رہا ہے۔ اس کا خاصا اثر ٹرانسپورٹ سسٹم پر بھی دیکھنے کو مل رہا ہے، خاص طور پر ریلوے خدمات بری طرح متاثر ہوئی ہیں۔ راجدھانی کی جانب آنے والی تقریباً 20 ٹرینیں اس وقت تاخیر سے چل رہی ہیں۔ عام طور پر کہرے کے باعث ٹرینوں کی رفتار پر اثر 15 دسمبر سے 15 فروری کے درمیان دیکھا جاتا ہے، لیکن اس بار غیر متوقع طور پر پہلے ہی یہ صورتحال پیدا ہو گئی ہے۔

شمالی ریلوے کے چیف پبلک ریلیشن آفیسر کے مطابق دہلی اور اس کے قریبی علاقوں میں کہرے کا اثر نہ ہونے کے باوجود دیگر علاقوں میں شدید کہرا چھایا ہوا ہے۔ اس کی وجہ سے کئی ٹرینیں تاخیر سے چل رہی ہیں۔

تاخیر سے چلنے والی ٹرینوں میں کاشی وشوناتھ ایکسپریس (241 منٹ)، شرم جیوی ایکسپریس (214 منٹ)، کالندی ایکسپریس (179 منٹ)، اودھ آسام ایکسپریس (139 منٹ)، ہوشیار پور-دہلی (122 منٹ)، پوروا ایکسپریس (92 منٹ)، شانِ پنجاب (68 منٹ)، وکرم شیلا ایکسپریس (54 منٹ)، یوگ نگری ایکسپریس (45 منٹ) شری شکتی ایکسپریس (41 منٹ) شامل ہیں۔

دیگر ٹرینیں جیسے پریاگ راج ایکسپریس، ریوا ایکسپریس، سلطان پور آنند وِہار ایکسپریس، سُہل دیو ایکسپریس بھی 30 سے 150 منٹ کی تاخیر سے چل رہی ہیں۔ کہرے کی وجہ سے شانِ پنجاب ٹرین کو امرتسر اور لدھیانہ کے درمیان رد کر دیا گیا ہے۔ وہیں ریل مسافروں کو صلاح دی گئی ہے کہ وہ گھر سے نکلنے سے پہلے ٹرین کا شیڈول ضرور دیکھ لیں تاکہ کسی طرح کی پریشانی سے بچا جا سکے۔

کہرے کا اثر بڑھنے سے آنے والے دنوں میں ٹرین خدمات مزید متاثر ہو سکتی ہے۔ ریلوے اس دوران کئی اور ٹرینوں کو منسوخ کر سکتا ہے۔ مسافروں کو تازہ جانکاری کے لیے ریلوے کی سرکاری ویب سائٹ اور ایپس کا استعمال کرنے کی صلاح دی گئی ہے۔