بھٹکل 17/اگست (ایس او نیوز) بھٹکل پولس نے فوڈ انسپکٹر کے ساتھ ایک گودام میں چھاپہ مارتے ہوئے مبینہ طور پر راشن کی دکان کا 6000 کلو (60 کینٹل) چاول برآمد کرلیا اور اسے ضبط کرنے کے ساتھ ساتھ تین لوگوں کو اپنی حراست لے لیا۔ چھاپہ ماری کی یہ کاروائی جمعرات کو جالی پنچایت حدود کے مینگو فارم کے قریب انجام دی گئی۔
بھٹکل مضافاتی پولس تھانہ کے انسپکٹر گوپی چندن اور فوڈ انسپکٹر پانڈو نائک سمیت پولس کے دیگر اہلکاروں نے مصدقہ اطلاع پر کاروائی کی اور تمام چاول کو اپنی تحویل میں لے لیا۔ سمجھا جارہا ہے کہ انّا بھاگیہ اسکیم کے تحت عوام کو تقسیم کرنے کا یہ چاول تھا، جسے تین لوگوں نے کسی طرح حاصل کرکے ایک گودام میں جمع کرکے رکھا تھا۔ پولس نے جن تین لوگوں کو اپنی تحویل میں لیا ہے، اُن کی شناخت گلشن صاحب، عبدالرحمن اور افضل کے طور پر کی گئی ہے اور 125 بوریوں پر مشتمل تمام 60 کینٹل چاول کو بندرروڈ پر واقع سرکاری گودام میں منتقل کردیا ہے۔ پولس نے بتایا کہ پوچھ تاچھ جاری ہے۔