دہلی میں شدید آلودگی سے عوام کا برا حال، کیجریوال اور وزیر اعلیٰ کی خاموشی پر کانگریس کا سخت ردعمل
نئی دہلی، 31/اکتوبر (ایس او نیوز /ایجنسی)دہلی ریاستی کانگریس کمیٹی کے صدر دیویندر یادو نے دہلی میں بگڑتی ہوئی فضائی آلودگی پر گہری تشویش کا اظہار کرتے ہوئے کہا کہ شہر کی ہوا معیار تیزی سے خراب ہو رہی ہے۔ انہوں نے بتایا کہ متعدد علاقوں میں ایئر کوالٹی انڈیکس (AQI) خطرناک سطح پر پہنچ چکا ہے، جہاں کچھ علاقوں میں AQI 300 سے تجاوز کر گیا ہے اور چند جگہوں پر یہ 400 کے قریب ہے۔ انہوں نے کہا کہ اس سنگین صورتحال کی وجہ سے اسپتالوں میں آنکھوں میں جلن اور سانس لینے میں دشواری کی شکایات بڑھتی جا رہی ہیں۔ دارالحکومت کے 13 مقامات پر آلودگی کی سطح سب سے زیادہ دیکھی جا رہی ہے، جن میں آنند وہار کا AQI 351 اور منڈکا کا 347 درج کیا گیا ہے، جو شہری صحت کے لیے خطرے کی گھنٹی ہے۔
دیویندر یادو کا کہنا ہے کہ گزشتہ کئی سالوں سے عام آدمی پارٹی کی حکومت یہ یقین دلاتی رہی ہے کہ وہ موثر اقدامات کے ذریعہ دہلی کی آلودگی اور جمنا کی گندگی کو ختم کر دے گی۔ حقیقت یہ ہے کہ زمینی سطح پر کوئی کام اب تک نہیں کیا گیا ہے۔ آلودگی پر قابو پانے کے متعلق صرف زبانی دعوے کئے جا رہے ہیں۔ دیوالی سے قبل ہی آلودگی کی وجہ سے لوگوں کی طبیعت خراب ہو رہی ہے۔ ایسے میں جب کل دیوالی کا تہوار ہے تو زہریلی ہوا میں اضافہ کا بہت زیادہ امکان ہے۔ اس کے بارے میں محکمہ موسمیات نے پہلے ہی آگاہ کر دیا ہے۔
دیویندر یادو نے کہا کہ کیجریوال اپنی پد یاترا کے دوران لوگوں سے ملنے سے ڈر رہے ہیں، کہیں انہیں دہلی کی عوام کے غصہ کا سامنا نہ کرنا پڑ جائے۔ پد یاترا کے دوران لوگ ان سے ایسے ایسے سوالات پوچھ رہے ہیں جن کا ان کے پاس کوئی جواب نہیں۔ کیجریوال اپنی پد یاترا میں صرف تعلیم اور صحت کے غیر موجود دہلی ماڈل کے بارے میں باتیں کر رہے ہیں۔ کیجریوال فضائی اور آبی آلودگی کی حقیقت کے بارے میں ایک لفظ بھی نہیں بولتے ہیں۔ آلودگی کے مسائل کو حل کرنے میں عام آدمی پارٹی کی حکومت مکمل طور پر ناکام ثابت ہوئی ہے۔
دہلی کانگریس صدر دیویندر یادو نے کہا کہ دہلی حکومت نے دھول، خستہ حال سڑکوں اور فضائی آلودگی جیسے بنیادی مسائل پر بالکل بھی توجہ نہیں دی ہے۔ جیل سے باہر آنے کے بعد کیجریوال، سسودیا، سنجے سنگھ، موجودہ وزیر اعلیٰ آتشی اور دیگر وزراء نے خستہ حال سڑکوں، دھول اور آلودگی والے علاقوں میں جا کر صرف ڈرامہ کیا تھا۔ اس وقت کیجریوال نے وعدہ کیا تھا کہ تمام خستہ حال سڑکیں دیوالی سے پہلے درست کر دی جائیں گی۔ کیجریوال کا یہ وعدہ بھی دیگر وعدوں کی طرح صرف ایک جملہ ثابت ہوا، اور کاغذوں تک ہی محدود رہا۔
