ٹوکیو، 3/اکتوبر (ایس او نیوز /ایجنسی)جاپان کے ایک ہوائی اڈے پر خوف و ہراس کی کیفیت اس وقت پیدا ہوئی جب ایک بم اچانک زوردار دھماکے سے پھٹ گیا۔ اس دھماکے نے ایئرپورٹ کے ٹیکسی وے میں بڑا گڈھا بنا دیا، جس کی وجہ سے 80 سے زیادہ پروازیں منسوخ کرنی پڑیں۔ جاپانی حکام نے بتایا کہ اس واقعے میں کسی بھی شخص کے زخمی ہونے کی کوئی خبر نہیں آئی۔ وزارت برائے اراضی و سفر کے عہدیداروں نے وضاحت کی کہ دھماکے کے وقت میازاکی ہوائی اڈے پر کوئی طیارہ موجود نہیں تھا۔

افسران کے مطابق ڈیفنس فورسز اور پولیس کی جانچ سے پتہ چلا ہے کہ دھماکہ 500 پاؤنڈ کے امریکی بم سے ہوا تھا۔ اس دھماکہ سے فی الحال کسی طرح کا خطرہ معلوم نہیں پڑ رہا۔ اس بات کی تحقیقات کی جا رہی ہے کہ آخر اچانک اس بم میں دھماکہ کیوں ہوا۔ یہ حادثہ ایک ہوابازی اسکول سے ریکارڈ کی گئی ویڈیو میں دیکھا گیا ہے۔ دھماکہ سے ڈامر کے ٹکڑے ہوا میں فوارے کی طرح اچھلتے ہوئے دکھائی دیے ہیں۔

جاپانی میڈیا کے مطابق سامنے آئی ویڈیو میں ٹیکسی وے پر ایک گہرا گڈھا دکھائی دے رہا ہے۔ یہ حادثہ پیش آنے کے فوراً بعد جاپان کی چیف کیبنٹ سکریٹری یوشیماسا ہیاشی نے کہا کہ ہوائی اڈہ پر 80 سے زائد پروازوں کو رد کر دیا گیا ہے۔ ساتھ ہی انھوں نے یہ بھی مطلع کیا کہ ایک دن بعد پھر سے پروازیں معمول کے مطابق ہوں گی۔