کنداپور 19 / ستمبر (ایس او نیوز) نیشنل ہائی وے 66 پر تھوکٹو بس اسٹاپ کے قریب پیش آئے سڑک حادثے میں ایک تیز رفتار اسکول وین بے قابو ہو کر سڑک کنارے موجود ہائی ماسٹ الیکٹرک پول سے ٹکرا گئی جس کے نتیجے میں ایک طرف وین کا اگلا حصہ بری طرح تباہ ہو گیا تو دوسری طرف وین ڈرائیور کے سر میں شدید چوٹ آئی جسے علاج کے لئے اسپتال میں منتقل کیا گیا ہے۔
بتایا جاتا ہے کہ ہیجماڈی پی یو کالج سے وابستہ وین ڈرائیور کی تیز رفتاری ہی اس حادثے کا سبب بن گئی کیونکہ ایک موٹر بائک کے ساتھ ٹکراو کو روکنے کی کوشش میں وہ اپنی وین پر قابو نہیں رکھ سکا اور گاڑی سیدھے بجلی کے کھمبے سے ٹکرا گئی ۔ تصادم اتنا خطرناک تھا کہ بلند و بالا بجلی کا کھمبا درمیان سے ٹوٹ گیا ۔
خوش قسمتی یہ ہوئی کہ حادثے کے وقت وین میں طلبہ موجود نہیں تھے، ورنہ صورتحال سنگین ہو سکتی تھی ۔ البتہ گاڑی میں صرف دو خواتین تھیں جو زخمی ہوگئی ہیں ۔
اس تعلق سے کوٹا پولیس اسٹیشن میں کیس رجسٹر کیا گیا ہے ۔