دہلی سمیت کئی ریاستوں میں بارش کا اورنج الرٹ
نئی دہلی، 3/جولائی (ایس او نیوز /ایجنسی) مانسو ن مقررہ وقت سے پہلے ملک میں پہنچ گیا ہے۔ راجستھان، ہریانہ اور پنجاب کے باقی حصوں میں بھی منگل کو بارش ہوئی۔ منگل کی شام دہلی این سی آر کے کچھ علاقوں میں ہلکی بارش ہوئی۔ اتر پردیش میں بھی مانسون نے اپنا رنگ دکھانا شروع کر دیا ہے۔ اتراکھنڈ اور ہماچل میں بھی مسلسل بارش ہو رہی ہے۔
محکمہ موسمیات کے مطابق بدھ کو دہلی میں بادل چھائے رہیں گے۔ اس دوران بارش ہو سکتی ہے اور تیز ہوائیں بھی چل سکتی ہیں۔ یہ ہوائیں 25 سے 35 کلومیٹر فی گھنٹہ کی رفتار سے چل سکتی ہیں۔ دہلی میں 4 سے 8 جولائی تک ہلکی بارش ہوسکتی ہے۔ اس دوران دہلی کا زیادہ سے زیادہ درجہ حرارت 33 سے 34 ڈگری کے درمیان اور کم سے کم درجہ حرارت 26 سے 28 ڈگری کے درمیان رہ سکتا ہے۔
بارش کی وجہ سے اتر پردیش میں بھی لوگوں نے راحت کی سانس لی ہے۔ اتر پردیش کے مغربی اور مشرقی حصوں میں آج بھی بارش ہو سکتی ہے۔
محکمہ موسمیات نے ہماچل پردیش میں یلو الرٹ جاری کیا ہے۔ یہاں 6 جولائی تک موسلادھار بارش ہوسکتی ہے۔ اتراکھنڈ میں بھی تیز بارش ہو سکتی ہے۔ اس حوالے سے اورنج الرٹ جاری کر دیا گیا ہے۔
دہلی میں بدلتے موسم کا اثر پنجاب اور ہریانہ میں بھی نظر آرہا ہے۔ یہاں 6 جولائی تک گرج چمک کے ساتھ تیز بارش ہوسکتی ہے۔
مدھیہ پردیش میں مانسون کی بارش جاری ہے۔ یہاں 6 جولائی تک موسلادھار بارش کا بھی امکان ہے۔ اس کے علاوہ راجستھان کے مشرقی اور مغربی علاقوں میں تیز بارش ہو سکتی ہے۔ اس حوالے سے یلو الرٹ بھی جاری کر دیا گیا ہے۔