بنگلورو ، 20/اکتوبر (ایس او نیوز /ایجنسی) راچن رویندرا کی شاندار بیٹنگ اور گیند بازوں کی بہترین کارکردگی کے باعث نیوزی لینڈ نے پہلے ٹیسٹ میں ہندوستان کو آٹھ وکٹوں سے شکست دے دی۔ ہندوستان کی ٹیم کو 462 رنز پر آؤٹ کرنے کے بعد نیوزی لینڈ کو جیت کے لیے 107 رنز کا ہدف ملا۔ تاہم، خراب روشنی کے سبب شام کے وقت مزید کھیل ممکن نہیں ہو سکا تھا، اور میچ اگلے دن مکمل ہوا۔

آج صبح کے سیشن میں ہندوستانی تیز گیند باز جسپریت بمراہ نے ٹام لیتھم (0) اور پھر ڈیون کونوے (17) کو آؤٹ کرکے نیوزی لینڈ کو میچ میں واپسی کی امید دلائی تھی۔ لیکن اس کے بعد بلے بازی کے لیے آنے والے ول ینگ اور راچن رویندرا نے تحمل سے بلے بازی کی اور اپنی ٹیم کو جیت سے ہمکنار کیا۔ ول ینگ (48 ناٹ آؤٹ) اور راچن رویندرا نے 39 رنز کی اننگز کھیلی۔ نیوزی لینڈ نے 27.4 اوورز میں دو وکٹوں پر 110 رنز بنائے اور آٹھ وکٹوں سے جیت درج کی۔ ہندوستان کی جانب سے جسپریت بمراہ نے دو وکٹیں حاصل کیں۔

اس سے قبل سرفراز خان اور رشبھ پنت کی شاندار بلے بازی کی بدولت ہندوستان نے اپنی دوسری اننگز میں 462 رنز بنا کر شاندار واپسی کی تھی۔ سرفراز نے ذمہ دارانہ اور محتاط انداز میں عمدہ کارکردگی کا مظاہرہ کیا اور شاندار 150 رنز بنائے، جبکہ رشبھ پنت نے جارحانہ انداز میں 99 رن بنا کر ناظرین کو پرجوش کیا، لیکن وہ سنچری سے محروم رہے۔ دونوں بلے بازوں کے درمیان 150 رنز کی شراکت ہوئی۔ ہندوستان نے دوسری اننگز میں 462 رنز بنائے تھے۔ ٹیم انڈیا کی پہلی اننگز صرف 46 رنز پر سمٹ گئی۔

نیوزی لینڈ نے اپنی پہلی اننگز میں راچن رویندرا (134)، ڈیون کونوے (91) اور ٹم ساؤتھی (65) کی شاندار اننگز کی بنیاد پر 402 رن کا اسکور بناکر 356 رنز کی برتری حاصل کر لی تھی۔ دراصل نیوزی لینڈ نے آخری بار 1988 میں ہندوستان کو شکست دی تھی۔ اس کے بعد، 36 سال کے طویل انتظار کے بعد ٹیم نے 2024 میں تین میچوں کی سیریز کا پہلا ٹیسٹ جیت لیا ہے۔