ممبئی 14/مئی (ایس او نیوز) ممبئی میں پیر دوپہر گردو غبار کے طوفان کے نتیجے میں سو فٹ لمبا بورڈ/ ہورڈنگ گرنے سے مرنے والوں کی تعداد  بڑھ کر 14 ہو گئی ہے ۔ ذرائع سے ملی اطلاع کے مطابق آج منگل صبح  بورڈ کے نیچے  ملبے سے مزید پانچ لاشیں نکالی گئی ہیں ، جہاں سو سے زائد لوگوں کے پھنسے ہونے کا خدشہ ظاہر کیا گیا تھا۔

یاد رہے کہ پیر کو طوفانی ہواوں کے ساتھ ہوئی بارش  سے ممبئی میں ایسٹرن ایکسپریس ہائی وے کے قریب گھاٹ کوپر میں چیڈا نگر جنکشن کے قریب پنت نگر میں پٹرول اسٹیشن اور سی این جی پمپ کے اوپرنصب کیا گیا  دیو ہیکل  بورڈ منہدم ہو گیا تھا۔ 

پیر  کو رات بھر ریسکیو اور ریلیف آپریشن چلایا گیا، بتایا گیا ہے کہ آج  منگل کو بھی ریلیف آپریشن جاری رہے گا۔

میڈیا سے ملی جانکاری کے مطابق برہن  ممبئی میونسپل کارپوریشن کے ڈیزاسٹر مینجمنٹ یونٹ نے 14 /اموات کی تصدیق کی ہے، جبکہ 80 سے زائد زخمیوں کو بچا نے کی خبر دی گئی ہے۔ 43افراد مختلف اسپتالوں میں زیر علاج ہیں جن میں سے ایک کی حالت تشویشناک  بتائی گئی ہے۔ زیادہ تر مریض ودیا وہار کے راجواڑی اسپتال میں داخل ہیں۔

مہاراشٹر کے وزیر اعلیٰ ایکناتھ شندے، جنہوں نے جائے وقوع کا معائنہ کیا اور امدادی کارروائیوں کی نگرانی کی، نے مرنے والوں کے لواحقین کے لیے 5 لاکھ روپے کی امداد کے ساتھ ساتھ زخمیوں کے لیے مفت طبی علاج کا اعلان کیا ہے۔

رپورٹوں کے مطابق اچانک اُٹھے گردوغبار  کے طوفان ، آندھی اور بارش نے ممبئی کے چھترپتی شیواجی مہاراج بین الاقوامی ہوائی اڈے پر فلائٹ آپریشن کو بھی متاثر کیا - جو ایشیا کے مصروف ترین ہوائی اڈوں میں سے ایک ہے -  یہاں تقریباً ایک گھنٹے تک ہوائی سروس متاثر رہی ہے۔

ممبئی سٹی کے جڑواں اضلاع اور ممبئی مضافاتی اور پڑوسی اضلاع پالگھر، تھانے اور رائے گڑھ میں موسم میں اچانک تبدیلی  سےدرخت اکھڑنے کے واقعات بھی پیش آئے۔

ایک الگ واقعے میں، ایک زیر تعمیر میٹل پارکنگ ٹاور بھی طوفان کے دوران وڈالا میں برکت علی نالہ کے گودام کے باہر سڑک پر گر گیا۔