سرسی 17/اگست (ایس او نیوز) تعمیرات  عامہ کے وزیر ستیش جارکی ہولی نے کہا کہ ساحلی، پہاڑی اورملناڈ وغیرہ کے دیہی علاقوں میں جہاں ضرورت ہے ا ُن علاقوں میں  فٹ بریج کی تعمیر کے لیے مناسب پروپوسل  پیش کرنے کی ہدایت دی گئی ہے۔

وزیر موصوف نے یہ بات اُس وقت کہی جب آتی کرم ہوراٹا سمیتی کے صدر رویندرا نائک کی قیادت میں ایک وفد نے اُن سے ملاقات کی اور وزیر کے علم میں یہ بات لائی کہ  اُترکنڑا کے کئی ساحلی، پہاڑی اور ملناڈ کے دیہی علاقوں میں راستے اور فُٹ بریج نہ ہونے سے کئی دیہاتوں سے رابطہ منقطع ہوگیا ہے، اس لئے فُٹ بریج کی تعمیر کے لئے  فنڈس کی ضرورت ہے۔ وزیر ستیش جارکی ہولی نے بتایا کہ حکومت نے پہلے ہی پرنسپل سکریٹری پبلک ورکس ڈیپارٹمنٹ کو ایک سرکلر جاری کیا ہے۔جس کے مطابق اس مسئلہ کی یکسوئی کے لئے مناسب کاروائی کی جائے گی۔

رویندرا نائک کی طرف سے پیش کئے گئے میمورنڈم میں بتایا گیا تھا کہ پہاڑی علاقوں سے رابطہ منقطع ہونے کی وجہ سے اُن دیہاتوں کے لوگ  بنیادی سہولیات سے بھی محروم ہیں، فُٹ بریج نہ ہونے کی وجہ سے دیہی علاقوں کے لوگوں کوبالخصوص طلبہ کو اسکول اور کالج جانے میں دشواریوں کا سامنا کرنا پڑرہا ہے۔

میمورنڈم میں تجویز پیش کی گئی ہے کہ ریاست میں کانگریس حکومت کے برسراقتدار آنے کے پس منظر میں حکومت نے ریاست کے دیہی  علاقوں میں ٥٠٠ فُٹ بریجوں کی منظوری کا  جو اعلان کیا تھا ، اُس میں سے ضلع اُترکنڑا کو خصوصی  گرانٹ دیا جانا چاہئے۔ چونکہ ضلع اُترکنڑا کے پہاڑی علاقوں میں آج بھی بنیادی سہولیات نہیں ہیں اور بارش کے موسم میں دیہاتیوں اور طلبہ  کی طرف سے جو عارضی راستے اور فُٹ بریج بنائے  جاتے ہیں، اُن پر سے چلنا خطرناک ثابت ہوتا ہے۔

 رویندرا نائک کے وفد میں سینئر کارکن جی ایم شیٹی انکولہ، بالاچندرا شیٹی اچی وے، مہابلیشور نائک بیڈکنی، آتی کرم ہوراٹا سمیتی کے منڈگوڈ تعلقہ کے صدر شیوانند جوگی، سنیل نائک سمپکھنڈ، یلا پور صدر بھیمسی والمیکی، ناگراج مراٹھی، دنیش نائک بیڈکنی وغیرہ موجود تھے۔

خصوصی گرانٹ:
  وزیر ستیش جارکی ہولی نے وفد کو بتایا کہ وہ اُترکنڑا کے ساحلی، پہاڑی اور ملناڈ کے علاقوں میں جہاں دیہی عوام؛  بنیادی سہولیات سے محروم ہیں اورراستے اور فُٹ  بریج ٹوٹنے کی وجہ سے رابطہ منقطع ہوگیا ہے، اُن علاقوں میں فُٹ بریج کی تعمیر کے لئے خصوصی گرانٹ فراہم کرنے کی کوشش کریں گے۔