کشتواڑ،16/اکتوبر (ایس او نیوز/ایجنسی) جموں و کشمیر کے کشتواڑ میں پیر کے روز ایک ہولناک آتشزدگی کا واقعہ پیش آیا جس میں 70 سے زائد مکانات جل کر خاکستر ہو گئے۔ آگ ایک گھر سے شروع ہوئی اور تیزی سے پھیل کر آس پاس کے گھروں کو اپنی لپیٹ میں لے لیا۔ مقامی افراد کے مطابق فائر بریگیڈ اور ایمرجنسی خدمات ہوائی راستے سے موقع پر پہنچیں اور بڑی مشکل سے آگ پر قابو پایا گیا، ورنہ یہ آگ مزید گھروں کو بھی جلا سکتی تھی۔

آتشزدگی کا یہ واقعہ کشتواڑ کے مالون گاؤں میں پیش آیا جہاں موٹر گاڑی چلنے لائق کوئی سڑک نہیں ہے۔ یہی وجہ ہے کہ فائر بریگیڈ کے اہلکاروں کو جائے وقوع تک پہنچنے میں تاخیر ہوئی اور آگ ایک گھر سے دوسرے گھر، دوسرے سے تیسرے گھر تک ہوتی ہوئی کم و بیش 6 درجن گھروں تک پھیل گئی۔ آگ لگنے کی خبر ملنے پر سینئر افسران فوراً جائے حادثہ پر ضرور پہنچ گئے تھے اور مقامی لوگوں کی مدد سے آگ بجھانے کی کوشش کی۔ اچھی بات یہ ہے کہ اس آتشزدگی واقعہ میں کسی ہلاکت کی خبر نہیں ہے۔ راحت و بچاؤ کاری کا عمل منگل کی صبح تک جاری رہا۔

افسران کا کہنا ہے کہ مالون گاؤں میں پیر کی دوپہر تقریباً 3 بجے ایک گھر میں رکھے بھوسے نے آگ پکڑ لی تھی جو فوراً پورے گھر میں پھیل گئی۔ چونکہ بیشتر گھر لکڑیوں سے بنے تھے اس لیے آگ پھیلنے میں زیادہ وقت نہیں لگا۔ لوگوں نے ان گھروں میں سردی کے پیش نظر مویشیوں کو کھلانے کے لیے بھوسا رکھا ہوا تھا جس کی وجہ سے آگ تیزی کے ساتھ پھیلتی ہی چلی گئی۔