بھٹکل 10/جولائی (ایس او نیوز) ریلوے پلیٹ فارم پر چلنے کے دوران اچانک پیچھے سے ٹرین کی ہلکی ٹکر پر ریلوے پٹری پر گر کر ایک شخص کا ہاتھ کٹ ہوکر بدن سے جدا ہوگیا اور شخص بری طرح زخمی ہوگیا جس کی شناخت داسا اِیرا موگیر (42) کی حیثیت سے کی گئی ہے جو بھٹکل تینگنگونڈی کا رہنے والا ہے۔ حادثے میں داسا کا ہاتھ کٹ کر بدن سے الگ ہونے کے ساتھ ساتھ اس کے سر کو بھی چوٹ لگی ہے ۔ اسے فوری طور پر بھٹکل سرکاری اسپتال سے ابتدائی طبی امداد کے بعد مینگلور وینلاک اسپتال شفٹ کیا گیا ہے۔ حادثہ بدھ دوپہر قریب1:15 بجے پلیٹ فارم نمبرون پر پیش آیا جب داسا بینگلور سے مرڈیشور جانے والی ٹرین کی زد میں آگیا۔
واردات کو لے کر ریلوے حکام کا کہنا ہے کہ داسا کے پاس ریلوے کا پلیٹ فارم ٹکٹ یا سفر کا کوئی ٹکٹ نہیں تھا، حکام کے مطابق اُس نے خودکشی کرنے کی کوشش کی، مگر واردات میں اُس کا ہاتھ کٹ ہوکر الگ جاگرا۔ داسا ٹرین کے اندر ریلوے ٹریک پر جاگرا تھا، مگر اُس کی جان بچ گئی۔ ریلوے حکام نے ہی اُسے فوری طور پر ایمبولنس کی مدد سے بھٹکل سرکاری اسپتال شفٹ کیا، جہاں ابتدائی طبی امداد کے بعد اسے مینگلور وینلاک اسپتال لے جایا گیا ہے۔ حادثے کے بعد ٹرین کے نیچے پٹری پر پھنسے ہوئے داسا کی موبائل سے لی گئی وڈیو سوشیل میڈیا پر وائرل ہوگئی ہے جس میں اس کا ہاتھ پٹری کے باہر گراہوا دیکھا گیا ہے اور داسا کو ٹرین کےنیچے پٹری پر پڑا ہوا دیکھا گیا ہے۔ پتہ چلا ہے کہ پوری واردات ریلوے اسٹیشن پر لگے سی سی ٹی وی میں قید ہوگئی ہے، مگر ریلوے حکام نہ سی سی ٹی وی فوٹیج دینے کے لئے تیار ہے اور نہ ہی میڈیا والوں کو فوٹیج دکھانے کے لئے تیار ہے۔ ریلوے پروٹیکشن فورس کے دفتر میں موجود انچارج اہلکار کا کہنا ہے کہ اعلیٰ آفسر کو ہی سی سی ٹی وی فوٹیج دکھانے یا دینے کا اختیار رہتا ہے اور فی الحال بھٹکل آر پی ایف انسپکٹر چھٹی پر ہے۔
رپورٹ لکھے جانے تک اس حادثہ کے تعلق سے بھٹکل پولس تھانہ میں کوئی شکایت درج نہیں ہوئی تھی۔