ہوناور کے گیرسوپّا ہائی وے پر بس نے اومنی وین کو ماری ٹکر؛ بھٹکل کے ایک شخص کی موت؛ بیوی زخمی
بھٹکل 28/جون (ایس او نیوز) بس اور ماروتی اومنی کے درمیان ہوئی ٹکر میں اومنی پر سوار بھٹکل کے ایک شخص کی موت واقع ہوگئی جبکہ اس کی بیوی زخمی ہوگئی جسے ہوناور اسپتال میں داخل کیا گیا ہے۔ حادثہ بھٹکل سے قریب 50 کلو میٹر دور پڑوسی تعلقہ ہوناور کے گیرسوپّا ہائی وے پر جمعہ شام قریب چار بجے پیش آیا۔
مہلوک کی شناخت بھٹکل مخدوم کالونی کے رہائشی سید عبدالواجد (40) کی حیثیت سے کی گئی ہے، جبکہ حادثے میں اس کی بیوی گلشن آراء کو چوٹ آئی ہے۔
ذرائع نے بتایا کہ دبئی سے قریب 28 دن پہلے بھٹکل لوٹنے والے عبدالواجد اگلے چند دنوں میں واپس دوبئی لوٹنے والے تھے، جس کے لئے وہ اپنے بھائی بہنوں سے ملاقات کرنے بیوی کو ساتھ لے کر اپنے آبائی گاوں شرالکوپہ جارہے تھے، گیرسوپّا ہائی وے پر مخالف سمت سے آنے والی پرائیویٹ بس کے ساتھ ان کی اومنی کی ٹکر ہوگئی۔ ٹکر میں عبدالواجد اور اس کی اہلیہ دونوں زخمی ہوئے تھے، دونوں کو فوری طور پر ہوناور اسپتال لے جایا گیا، جہاں عبدالواجد کی نازک حالت کو دیکھتے ہوئے اُسے اُڈپی اسپتال لے جانے کی کوشش کی گئی، مگر شام قریب چھ بجے اُڈپی اسپتال پہنچنے سے پہلے ہی عبدالواجد نے زخموں کی تاب نہ لاکر دم توڑ دیا۔
رات قریب 8:45 بجے میت اُڈپی سے بھٹکل پہنچی، بھٹکل سرکاری اسپتال میں پوسٹ مارٹم کے بعد میت کو گھر لے جایا گیا۔
ذرائع نے بتایا کہ مرحوم عبدالواجد کی تین لڑکوں سمیت چھ اولاد ہیں۔ زخمی اہلیہ کے تعلق سے پتہ چلا ہے کہ وہ خطرے سے باہر ہیں۔