کوالا لمپور،2/دسمبر (ایس او نیوز /ایجنسی) جنوبی تھائی لینڈ اور شمالی ملیشیا میں حالیہ سیلاب نے وسیع پیمانے پر تباہی مچادی ہے۔ موسمی بارشوں اور سیلاب کے باعث دونوں ممالک میں ہزاروں افراد کی زندگیوں پر منفی اثرات مرتب ہوئے ہیں۔ خبر رساں ایجنسی ’رائٹرز‘ کے مطابق، 30 نومبر تک سیلاب کے نتیجے میں 12 افراد کی ہلاکت ہو چکی ہے۔ کئی علاقوں میں گھروں میں پانی داخل ہو چکا ہے جس کے باعث لوگوں کو محفوظ مقامات پر منتقل کیا گیا ہے۔ آفات سے بچاؤ اور بحالی کے محکمہ کے مطابق، جنوبی تھائی لینڈ میں سیلاب نے تقریباً 534,000 گھروں کو متاثر کیا ہے۔ 29 نومبر تک ہلاکتوں کی تعداد 9 تھی، اور متاثرہ افراد ہزاروں کی تعداد میں 200 عارضی ریلیف کیمپوں میں پناہ لینے پر مجبور ہیں۔

صوبہ سونگکھلا کے چانا ضلع میں آنے والے شدید سیلاب نے 50 سال کا ریکارڈ توڑ دیا ہے۔ انٹرنیٹ پر وائرل ہونے والے سیلاب کی کئی ویڈیو فوٹیج میں سیلاب کی شدت کو دیکھا گیا ہے۔ جن میں لوگوں کو ٹرکوں پر گھروں سے باہر نکالا جا رہا ہے کیونکہ ان کے گھر سیلابی پانی میں ڈوب گئے ہیں۔ جبکہ ایک ویڈیو میں یالا صوبے کے ستینگ نوکو ضلع میں امدادی کارکن سیلاب سے متاثرہ مکان کی چھت سے ایک بچے کو نکالتے ہوئے بھی نظر آ رہے ہیں۔

نیشنل ڈیزاسٹر کنٹرول سینٹر نے کہا کہ تھائی لینڈ کے پڑوسی ملک ملیشیا میں آنے والے شدید سیلاب سے 9 ریاستوں کے تقریباً 139000 لوگ متاثر ہوئے ہیں۔ جمعہ (29 نومبر) تک یہاں 3 لوگوں کی موت ہو چکی ہے۔ تھائی لینڈ کے پڑوسی ملک فلپائن کو صرف نومبر کے مہینے میں 6 سمندری طوفانوں کا سامنا کرنا پڑا تھا۔ جس کیوجہ سے فلپائن میں بڑے پیمانے پر تباہی مچی تھی۔