بھٹکل میں چوری کی تازہ واردات؛ رقم اور سونا نہیں ملا تو کیا کیا اُٹھالے گئے چور ؟
بھٹکل 9 /جولائی (ایس او نیوز) بھٹکل شفاء کراس پر واقع ایک مکان پر اتوار کو چوری کی واردات پیش آئی ہے، جس میں چوروں کو الماریوں میں سونے کے زیورات اور نقد رقم وغیرہ نہیں ملیں تو حیرت انگیز طور پر چوروں نے انورٹر بیٹری، باتھ روم پر لگے ہوئے پانی کے نلکے، سرکیٹ بریکر اور پریشر کوکر وغیرہ اُٹھالے گئے ہیں۔
مالک مکان محمدعتیق خطیب بینگلور میں رہتےہیں، اُن کی بہن نے ٤ جولائی کو مکان کا چکر لگایا تھا تو سب کچھ ٹھیک ٹھاک تھا، مگر آج اتوار ٩ جولائی کو دوبارہ گھر پہنچ کر جائزہ لیا تو پتہ چلا کہ داخلی دروازے کو نقصان پہنچایا گیا ہے۔ بتایا گیا ہے کہ لاک دروازے کو طاقت کے زور پر توڑ کر چور اندر داخل ہوئے ہیں ۔ گھر کے اندر کی الماریاں ٹوٹی ہوئی پائی گئی اور سارا سامان بکھرا ہوا پڑاتھا۔ اسی کے ساتھ پتہ چلا کہ گھر کے قیمتی ساز وسامان لے کر چور رفوچکر ہوگئے ہیں۔
اطلاع ملتے ہی بھٹکل مضافاتی پولس جائے وقوع پر پہنچی اور تفصیلات حاصل کرتے ہوئے چھان بین شروع کردی۔
Bhatkal Burglary: Thieves Fail to Find Gold and Cash, Make Off with Household Items
