کنداپور یکم / اکتوبر (ایس او نیوز) ایک بے قابو ٹِپّر لاری کی  ٹکر کے نتیجے میں ایک نوجوان کی موقع پر ہی موت واقع ہوگئی جس کی شناخت تعلقہ کے ناگور کے رہائشی دھنش کی حیثیت سے کی گئی ہے۔ حادثہ منگل دوپہر کو اُس وقت پیش آیا جب  دھنش اپنے دیگر دو دوستوں کے ساتھ  کالج کی کلاسس ختم کرکے گھر لوٹ رہا تھا  کہ ایک ٹِپّر لاری اچانک پیچھے سے آکر فُٹ پاتھ پر چڑھتے ہوئے  دھنش کو ٹکر مارنے کے بعداُسے روندتے ہوئے آگے بڑھ گئی۔ بتایا گیا ہے کہ دھنش کی موقع پر ہی موت واقع ہوگئی، البتہ اس کے ساتھ چلنے والے دیگر دو دوست معجزاتی طور پر بچ گئے۔

واردات کے بعد سوشیل میڈیا پر حادثے کی وڈیو کلپ وائر ل ہوگئی جس میں دیکھا گیا ہے کہ  ٹِپّر لاری ایک کار کو ٹکر مارنے سے بچنے کی کوشش میں سڑک کنارے فٹ پاتھ پر چڑھتے ہوئے ایک نوجوان کو روندتے ہوئے آگے بڑھ رہی ہے۔

دھنش کوٹیشور میں واقع سرکاری کالج میں بی ایس سی (اول) کا طالب علم تھا۔

کنداپور ٹریفک پولیس نے کیس درج کر لیا ہے ۔ مزید تحقیقات جاری ہے ۔