کنداپور، 5 / اکتوبر(ایس او نیوز) کنداپور تعلقہ کے اپوندا گرام پنچایت میں آنے والے مڈیکل اور کرکیکالی علاقے میں دو سو افراد بیمار ہوگئے جن کے بارے میں شبہ ہے کہ وہ ہیضہ (کالرا) کا شکار ہوئے ہیں ۔
    
اطلاع ملنے پر تحصیلدار پردیپ اور محکمہ صحت کے افسران نے متاثرہ علاقے کا دورہ کیا اور حالات کے جائزہ لیا ۔ افسران نے بتیا کہ عوام کو چونکہ ہیضہ کا شبہ ہے اس لئے متاثرہ علاقے سے پنچایت کے ذریعے سپلائی کیے جا رہے پینے کے پانی کے نمونے حاصل کیے جائیں گے اور انہیں  پانی سے پھیلنے والی بیماریوں کی جانچ کے لئے بھیجا جائے گا ۔ جانچ رپورٹ حاصل ہونے کے بعد ضروری اقدامات کیے جائیں گے ۔ علاقے کے دوررے کے موقع پر تعلقہ میڈیکل آفیسر ڈاکٹر راجیش، تعلقہ پنچایت سی ای او بھارتی وغیرہ موجود تھے ۔ 
    
محکمہ صحت کے افسران نے بتایا کہ یہ مرض پانی سے پھیلا اور پھر ایک دوسرے کو متاثر کرتا جا رہا ہے ۔ تقریباً 145 افراد علاج و معالجے کے بعد صحت یاب ہو چکے ہیں ۔ تین مریضوں کو کنداپور اور بیندور کے سرکاری اسپتال میں زیر نگرانی رکھا گیا ہے ۔ کچھ مریض پرائیویٹ اسپتالوں میں بھی زیر علاج ہیں اور کچھ مریض گھر پر خود ہی اپنا علاج کر رہے ہیں ۔ البتہ اب تک کوئی سنگین معاملہ سامنے نہیں آیا ہے ۔ 
    
معلوم ہوا ہے کہ بیندور پرائمری ہیلتھ سنیٹر میں مریض کے علاج میں شامل رہی ایک نرس بھی اس مرض سے متاثر ہوئی ہے اور اب وہ زیر علاج ہے ۔