بھٹکل یکم اکتوبر (ایس او نیوز) کرناٹک ہائی کورٹ کے جسٹس اور اترا کنڑ ڈسٹرکٹ  کے ایڈمنسٹریٹو جج   کے ۔ نٹراجن نے اتوار کی صبح بھٹکل کورٹ کمپلیکس کا دورہ کیا اور اس کا معائنہ کیا۔ اس موقع پر بھٹکل بار اسوسی ا یشن کی طرف سے ان کا خیر مقدم کیا گیا اور ان کی تہنیت کی گئی۔

اس موقع پر وُکلاء تنظیم نے موصوف کو ایک میمورنڈم پیش کرتے ہوئے  بھٹکل کورٹ کامپلیکس کے تعمیری کام میں تیزی لانے  اور ایک نئی عمارت تعمیرکرنے کی درخواست کی، ساتھ ساتھ  بھٹکل عدالت میں ایڈیشنل ڈسٹرکٹ کورٹ بینچ کے قیام کا بھی  مطالبہ کیا۔

جسٹس نٹراجن  نے اس موقع پر خطاب کرتے ہوئے کہا کہ   بھٹکل بار ایسوسی ایشن اگرچہ چھوٹی ہے، لیکن عدلیہ میں اس کا تعاون بہت زیادہ ہے۔ انہوں نے اپنی اس خواہش کا اظہار کیا کہ یہاں کے نوجوان وکلاء مستقبل میں جوڈیشل سروس میں شامل ہوں گے۔انہوں نے کہا کہ آپ نے بھٹکل میں ایک نئی عمارت کے لیے کہا ہے اور یہ پہلے ہی منظوری کے مرحلے میں ہے لہٰذا  جلد ہی عمارت کی منظوری کے لیے کارروائی کی جائے گی۔بھٹکل میں  ایڈیشنل ڈسٹرکٹ کورٹ  کے تعلق سے   انہوں نے وعدہ کیا کہ وہ  بنگلور جانے کے بعد اس معاملے پر کارروائی کریں گے اور ضلعی عدالت یا عبوری عدالت کی اضافی بنچ کی منظوری کے لئے اپنی جانب سے کوشش کریں گے۔

بار ایسوسی ایشن کے صدر ایڈوکیٹ گنیش ایم  دیواڑیگا نے پروگرام کی صدارت کی۔ عدالت کی نئی عمارت  تعمیر کرنے کے لئے قائم کی گئی  کمیٹی کے چیئرمین ایم ایل نائک نے نئی عمارت کی منظوری اور ڈسٹرکٹ کورٹ بنچ کے قیام کی درخواست پیش کی۔

اس موقع پر ڈسٹرکٹ سیشن جج جی ایس۔ اُدے کمار، سینئر سول جج کانتا کورانی، پرنسپل سول جج ونود بالا نائک وغیرہ موجود تھے۔

سینئر ایڈوکیٹ اور نوٹری آر آر شریٹھی نے استقبال کیا اور تعارفی تقریر کی۔
اس سے قبل  جسٹس کے. نٹراجن نے کورٹ کمپلیکس کے کورٹ ہال، ججوں کے کوارٹرز اور اس جگہ کا معائنہ کیا جہاں نئی ​​عمارت کی تعمیر کی تجویز  ہے۔ اس موقع پر سینئر ایڈوکیٹ جے ڈی نائک ،  وکٹر گومز، ایس بی بومئی، ناگراج ای ایچ موجود تھے۔  سابق صدر پانڈو نائک ،  شنکرکے۔ نائک، وی آر صراف، ایم جے نائک، بار ایسوسی ایشن کے سکریٹری ناگراج نائک، اسسٹنٹ پبلک پراسیکیوٹر وویک نائک، ایڈوکیٹ رویندرا، ایم ٹی نائک، نارائن نائک، آر جی نائک، ایشورا نائک، جی ایس دیواڈیگا سمیت  عدالتی عملہ بھی موجود تھا۔