ریاست میں بڑھتا ہوا ڈینگی کا قہر - 6 مریضوں کی موت - 824 افراد متاثر
بینگلورو، یکم جولائی (ایس او نیوز) مانسوں کے موسم کے ساتھ ریاست میں ڈینگی بخار کا قہر بڑھتا جا رہا ہے ۔ چکمگلورو ضلع میں ڈینگی میں مبتلا ایک شخص کی موت کے ساتھ سرکاری ذرائع کے مطابق ریاست میں اس مرض سے مرنے والوں کی تعداد چھ ہوگئی ہے جبکہ بینگلورو میں ڈینگی سے متاثرہ افراد کی تعداد 824 ہوگئی ہے ۔
ریاستی محکمہ صحت کے اعداد و شمار کے مطابق ہاسن ضلع میں 2، دھارواڑ، شیموگہ اور ہاویزی میں ایک ایک مریض کی موت واقع ہوئی ہے ۔ بینگلورو میں ڈینگی سے ہونے والی موت کو سرکاری طور پر شمار نہیں کیا گیا ہے پھر بھی اس بات کی تصدیق ہوگئی ہے کہ ایک 27 سالہ مریض یہاں بھی فوت ہو چکا ہے ۔
بینگلورو شہر میں گزشتہ دس دنوں کے اندر کم از کم 824 ڈینگی کے معاملے سامنے آئے ہیں ۔ بینگلورو میونسپل کارپوریشن کے اسپیشل کمشنر وکاس کشور کا کہنا ہے کہ بینگلورو میں جو دو اموات ہوئی ہیں ان میں سے 80 سالہ خاتون کی موت کینسر کی وجہ سے ہوئی ہے جبکہ 27 سالہ مریض ڈینگی کی وجہ سے فوت ہوا ہے ۔
امسال جنوری سے بینگلورو میں 6,904 ڈینگی کے مشکوک معاملات کی جانچ کی گئی اور ان میں سے 1586 معاملوں میں ڈینگی ہونے کی تصدیق ہوئی ۔ محکمہ صحت کا کہنا ہے کہ مچھروں کی افزائش روکنے کے لئے ان کے ٹھکانوں کو ختم کرنے ، گھر گھر جا کر سروے کرنے اور صفائی ستھرائی کے تعلق سے عوام میں بیداری لانے جیسے احتیاطی اقدامات کیے جا رہے ہیں ۔