بینگلور 18 ستمبر (ایس او نیوز) کرناٹک کے وزیر اعلیٰ سدارامیا نے بدھ کے روز ایک پریس کانفرنس میں دعویٰ کیا کہ انڈیا اتحاد جلد ہی مرکز میں حکومت بنانے جارہی ہے اور این ڈی اے حکومت  کسی بھی وقت گرسکتی ہے۔ سدرامیا نے کہا کہ  این ڈی اے حکومت اپنی پانچ سالہ مدت مکمل نہیں کرپائے گی۔سدرامیا کے مطابق  بی جے پی کے رہنما حالیہ انتخابات میں شکست کے بعد راہول گاندھی کو نشانہ بنا رہے ہیں۔

سدارامیا نے کہا، "بی جے پی کے لیڈران راہول گاندھی کو دھمکیاں دے رہے ہیں کیونکہ لوک سبھا انتخابات میں انہیں ناکامی کا سامنا کرنا پڑا ہے۔ہم 100 سیٹیں حاصل کر چکے ہیں، جلد مرکز میں اقتدار سنبھالیں گے،میں مستقبل کی پیشین گوئی  کرنے میں یقین نہیں رکھتا، البتہ سیاسی منظرنامے  کی بنیاد پر کہہ رہا ہوں کہ وزیر اعظم نریندر مودی اپنی پانچ سالہ مدت مکمل نہیں کرپائیں گے۔"

ہوم آفس کرشنا میں منعقدہ پریس کانفرنس میں سدرامیا نے کہا کہ "آپ دیکھئے، مرکزی حکومت میں کس طرح کی سیاسی پیش رفت ہورہی ہیں۔  جے ڈی یو اور ٹی ڈی پی کی حمایت سے مودی ابھی تک وزیراعظم کے عہدے پر بنے ہوئے ہیں لیکن جے ڈی یو اور چندرابابو نائیڈوکسی بھی وقت اپنی حمایت واپس لے سکتے ہیں پھر کیا ہوگا؟"

بی جے پی کے اس دعوے کا جواب دیتے ہوئے کہ ریاست میں ان کی سربراہی والی حکومت کسی بھی وقت گر سکتی ہے، انہوں نے کہا: "ہم نے 136 سیٹیں جیتی ہیں (224 ممبران اسمبلی میں)۔پھر یہ کیسے گرے گی؟ انہوں نے میڈیا والوں سے کہا کہ  ہماری چُنی ہوئی سرکار کے خاتمے کے بارے میں  بی جے پی کے ایسے دعووں کو اہمیت نہ دیں ۔"

لوک سبھا میں قائد حزب اختلاف راہول گاندھی پر تنقید  کرنے اور جھوٹے الزامات لگانے  کی بات کرتے ہوئے سدرامیا نے کہا کہ  بی جے پی کی جانب سے راہول گاندھی کو جان سے مارنے کی دھمکیاں  دی جارہی ہیں ، اس پر شدید ردعمل ظاہر کرتے ہوئے  انہوں نے کہا کہ یہ دھمکیاں راہول گاندھی کی بڑھتی ہوئی مقبولیت کو برداشت نہ کر پانے کی وجہ سے دی جا رہی ہیں۔ انہوں نے کہا، "راہول گاندھی کو دھمکیاں دے کر دبایا نہیں جا سکتا، ان کی مقبولیت سے خائف ہو کر بی جے پی ایسے ہتھکنڈے اپنا رہی ہے۔"

رپورٹ انگریزی میں پڑھنا چاہتے ہوں تو  یہاں کلک کریں

سدارامیا نے بی جے پی لیڈران کے بیانات کا حوالہ دیتے ہوئے کہا کہ بی جے پی لیڈر تروندر سنگھ مرواہ، رو نیت سنگھ  بٹو، رگھو راج سنگھ اور شیوسینا ایم ایل اے سنجے گائیکواڈ نے براہ راست راہول گاندھی کو دھمکیاں دی ہیں۔

انہوں نے کہا کہ مرواہ نے راہول گاندھی کو کھلے عام قتل کی دھمکی دی، جبکہ گائیکواڈ نے راہول گاندھی کی زبان کاٹنے کے لیے 11 لاکھ روپے کے انعام کا اعلان کیا۔ سدارامیا نے مہاراشٹرا حکومت سے مطالبہ کیا کہ گائیکواڈ کے خلاف فوری کارروائی کی جائے اور انہیں فوری طور پر جیل بھیجا جائے۔

سدارامیا نے اس بات پر بھی شدید ناراضگی ظاہر کی  کہ اتر پردیش کے وزیر رگھو راج سنگھ نے راہول گاندھی کو "بھارت کا نمبر ون  دہشت گرد" قرار دیا، لیکن ایسوں کے خلاف کوئی کاروائی نہیں کی جارہی ہے۔ سدرامیا نے کہا کہ  جان سے مارنے کی دھمکیاں دینا کوئی چھوٹی بات نہیں ہے، تعجب اس بات پر ہے کہ بی جے پی حکومت کا ان لیڈران کے خلاف کاروائی نہ کرنا اس بات کی عکاسی کرتا ہے کہ وہ ان کی حوصلہ افزائی کر رہے ہیں۔جو راہول کے خلاف بیانات دے رہے ہیں۔  میں ان کے خلاف فوجداری مقدمات اور سخت کارروائی کا مطالبہ کرتا ہوں۔ اگر بی جے پی کو لگتا ہے کہ اس طرح کے کام کرکے وہ راہل گاندھی کو سیاسی طور پر ختم کر نے کی کوشش کررہے ہیں  تو  ان کی ایسی  حماقت کو کانگریس کبھی برداشت نہیں کرے گی۔