بنگلورو،6/مارچ (ایس او نیوز/ایجنسی)   کرناٹک کے وزیراعلیٰ سدرامیا اور نائب وزیراعلیٰ شیوکمار  کو ایک دھمکی آمیز ای  میل موصول ہوا ہے جس میں     25 لاکھ امریکی ڈالر (20.7 کروڑ روپے) کا مطالبہ کیا گیا ہے اور یہ رقم نہ دینے پر ریاست میں دھماکے کرنے کی دھمکی دی گئی ہے۔  اس بات کا ا نکشاف  ڈی کے شیوکمار نے منگل کو  کیا۔

انہوں نے کہا کہ  موصولہ ای میل پولیس حکام کو بھیج دی  گئی ہے اور پولیس اسے بھیجنے والے کا پتہ لگانے کی کوشش کر رہی ہے۔ یہ دھمکی یکم مارچ کو بنگلورو کے 'دی رامیشورم کیفے' میں ہونے والے دھماکے کے فوراً بعد دی گئی ہے۔

ریاستی کانگریس کے سربراہ نے کہا، ’’مجھے اور وزیر اعلیٰ سدارمیا کو تین دن پہلے ای میل ملا تھا، یہ میرے فون میں ہے اور میں نے اسے تحقیقات کے لیے پولیس کو بھیج دیا ہے۔‘‘ ان کے مطابق  ’شاہد خان10786‘  کے نام سے ای میل موصول ہوا ہے، جس نے مستقبل میں رابطے کے لیے ایک اور ای میل آئی ڈی بھی شیئر کی ہے۔ دھمکی آمیز ای میل میں لکھا ہے، ’’وارننگ - ایک - آپ نے ہماری فلم کا ٹریلر دیکھا، اگر آپ ہمیں 25 لاکھ امریکی ڈالر نہیں دیں گے تو ہم پورے کرناٹک میں بسوں، ٹرینوں، ٹیکسیوں، مندروں، ہوٹلوں اور عوامی مقامات پر زبردست دھماکے کریں گے۔‘‘

میل میں مزید کہا گیا ہے  کہ ’’وارننگ-2- ہم آپ کو ایک اور ٹریلر دکھانا چاہتے ہیں، اگلے ٹریلر میں ہم امباری اتسو بس میں دھماکہ کریں گے۔ بس میں دھماکے کے بعد، ہم سوشل میڈیا پر اپنا مطالبہ اٹھائیں گے اور آپ کو جو میل بھیجا گیا ہے اس کے اسکرین شاٹس سوشل میڈیا پر اپ لوڈ کرے گی۔ ہم دھماکے کے بارے میں مزید معلومات سوشل میڈیا پر شیئر کریں گے۔‘‘

نائب وزیر اعلیٰ ڈی کے شیوکمار نے کہا، ’’ہم نہیں جانتے کہ یہ میل فرضی ہے، دھوکہ دہی پر مبنی ہے، سچا ہے، جھوٹا ہے یا بھیجنے والا بلیک میلر ہے! ہم نے اسے  پولیس حکام کو بھیج دیا ہے، وہ اس کی تحقیقات کر رہے ہیں۔‘‘