بھٹکل، 13/مئی (ایس او نیوز/پریس ریلیز ) مدارس و اسکول میں سالانہ تعطیلات کے موقع پر مرکز حافظ ابن حجر العسقلانی بھٹکل کے زیر اہتمام حسب سابق پندرہ روزہ اسلامک سمر کیمپ کا انعقاد کیا گیا جو 21 اپریل کو شروع ہوکر 5 مئی کو کامیابی کے ساتھ اختتام پذیر ہوا۔ اس سمر کلاس میں بھٹکل کے مختلف دینی وعصری اسکولوں میں زیر تعلیم تقریباً 120 طلبہ شریک رہے جنھیں کل 7 حلقوں میں تقسیم کیا گیا تھا۔
پندرہ روزہ سمر کیمپ میں بچوں کو قرآن کی مخصوص سورتیں، اور صبح وشام کے اذکار یاد کرنے کا پابند بنایا گیا تھا۔ ساتھ ہی ساتھ عقیدہ، فقہ، آداب اور سیرت کے تعلق سے بھی مفید معلومات فراہم کی گئیں اور طلبہ نے بھی بہت ہی دلچسپی کا مظاہرہ کرتے ہوئے خوب استفادہ کیا۔
اخیر میں بچوں کے لیے قرآن، سیرت اور صحابہ کے متعلق مزید معلومات فراہم کرنے اور اس کو یاد رکھنے کے لیے کوئز مسابقہ کا انعقاد کیا گیا جس میں 5 طلبہ نے مکمل حفظ کیا جنہیں گراں قدر انعامات سے نوازا گیا، اسی کے ساتھ عمدہ کارکردی پیش کرنے والے تقریبا 40 طلبہ کو مومینٹو اور بقیہ تمام طلبہ کو تشجیعی انعامات سے نوازا گیا ہے ۔
سمر کیمپ میں بچوں کو تعلیم کے ساتھ کھیل اور تواضع (رفریشمنٹ) کا بھی انتظام کیا گیا تھا۔ جس سے تمام طلبہ خوب لطف اندوز ہوئے۔
9 مئی بروز جمعرات مغرب تا عشاء اختتامی اجلاس منعقد کیا گیا تھا جس میں بطور مہمان خصوصی فضیلة الشیخ شاکر مٹا عمری مدنی حفظہ اللہ تشریف فرما تھے، جس میں سمر کیمپ کے طلبہ نے اپنی کارکردگی پیش کی اور شیخ محترم نے سمر کیمپ اور صباحیہ ومسائیہ کلاسز کی اہمیت وافادیت پر گفتگو کی ۔ 10 مئی بروز جمعہ کیمپ میں شریک تمام طلبہ کے لیے بعد نماز جمعہ پکنک کا بھی انتظام کیا گیا تھا۔
کیمپ کے اختتام کے موقع پر منتظمین نے دعا کی کہ سمر کیمپ کو چلانے میں جن لوگوں نے بھی دامے، درمے، قدمے، سخنے کسی بھی طرح کا تعاون پیش کیا ہو اللہ رب العالمین ان کی خدمات کو قبول فرمائے ۔