گلبرگہ، 22/اکتوبر (ایس او نیوز /راست ) ضلع گلبرگہ میں حاملہ خواتین کی زندگی کو محفوظ بنانے اور ان کی صحت کو بہتر کرنے میں کئی مشکلات پیش آ رہی ہیں۔ اطلاعات کے مطابق، اپریل سے ستمبر 2024 کے دوران ضلع بھر میں 22 حاملہ خواتین کی اموات ہوئیں، جبکہ گزشتہ سال اسی مدت میں یہ تعداد 19 تھی۔ اس سال کے دوران، گلبرگہ کے شہری علاقوں سے 8 حاملہ خواتین، چنچولی تعلقہ سے 6، دیہی علاقوں سے 4، اور افضل پور سے 2 حاملہ خواتین کی موت ہوئی۔ الند اور چیتاپور تعلقہ سے بھی ایک ایک حاملہ خاتون کی اموات کی اطلاعات ہیں۔

اعداد و شمار کے مطابق، ان اموات میں سے 7 ایک بیماری، ایکلیامپسیا (Eclampsia) کے سبب ہوئی ہیں، جو کہ خون کے دباؤ میں اضافہ اور مریض کے پیشاب میں پروٹین کی موجودگی یا دیگر اعضاء کی غیر معمولی کارکردگی کی وجہ سے ہوتی ہیں۔ اس کے علاوہ، زچگی کے دوران یا زچگی کے بعد 3 اموات خون بہنے کے باعث واقع ہوئیں۔ کچھ اموات نامعلوم وجوہات کی بنا پر بھی ہوئی ہیں، اور بچے کی پیدائش کے دوران مختلف بیماریوں کی وجہ سے بھی حاملہ خواتین کی جانیں گئی ہیں۔