بھٹکل 10/جولائی (ایس او نیوز ) موسم کا حال بتانے کا ذمہ دار محکمہ موسمیات بارش کے تعلق سے صحیح اطلاع دینے میں  بار بارناکام  ثابت ہورہا ہے۔ اتوار کو بھٹکل سمیت پورے ساحلی کرناٹکا میں اورینج الرٹ جاری کیا گیا تھا، مگر  بارش اتنی  زوردار ہوئی کہ  بھٹکل میں ہی 209 ایم ایم بارش ریکارڈ کی گئی، ہوناور، کمٹہ اور اُڈپی میں کئی لوگوں کو متاثرہ علاقوں سے  محفوظ مقام پر منتقل کرنے کے لئے  این ڈی آر ایف ٹیم کو میدان میں اُترنا پڑا تھا،  اتنی زوردار بارش کے باوجود  اسکولوں اور کالجوں میں چھٹی نہیں دی گئی۔ البتہ  اتوار کو ہوئی زوردار بارش کو دیکھتے ہوئے اگلے دن  پیر اور منگل کو  اسکولوں اور کالجوں میں چھٹی کا اعلان کیا گیا،   یہاں تک کہ منگل کو پورے ساحلی کرناٹکا میں ریڈ الرٹ جاری کیا گیا، مگر پیر کو بھٹکل میں  79  ایم ایم اور منگل کو ریڈ الرٹ جاری کرنے کے بعد  صرف 19 ایم ایم بارش ریکارڈ کی گئی۔ واضح رہے کہ  بارش کی پیمائش کا ریکارڈ محکمہ موسمیات کی جانب سے اگلے دن جاری کیا جاتا ہے۔ (یعنی اتوار صبح آٹھ بجے سے پیر صبح آٹھ بجے تک ہوئی  بارش کی پیمائش کا ریکارڈ پیر کو  فراہم کیا جاتا ہے)

اتوار کی طرح اتوار سے دو تین روز قبل بھٹکل اور ساحلی کرناٹکا میں  جمعرات اور جمعہ کو بھی شدید بارش ریکارڈ کی گئی تھی، مگر  محکمہ موسمیات کی جانب سے  اورینج الرٹ ہی جاری کیا گیا تھا  ۔

 واضح رہے کہ محکمہ موسمیات ہر روز موجودہ دن کے ساتھ آئندہ ۴؍ روز یعنی کُل ۵؍ دنوں کے تعلق سے بارش کی پیش گوئی کرتا ہے۔ پیش گوئی کو سمجھنے میں آسانی کیلئے رنگوں کے ’کوڈ‘ دیئے جاتے ہیں۔ جس میں ہرے رنگ(گرین الرٹ) میں بارش کے امکانات انتہائی کم ہوتے ہیں، اسکے بعد پیلے رنگ(یلوالرٹ) میں بارش کے امکانات تھوڑے  بڑھ جاتے ہیں، اس کے بعد اورینج الرٹ اس وقت جاری کیا جاتا ہے جب زیادہ بارش کا خدشہ ہوتا ہے اور ریڈ الرٹ میں شدید تر بارش ہونے کی پیش گوئی ہوتی ہے۔ ان رنگوں کے ساتھ مختصراً بارش کے امکانات کے تعلق سے تحریر بھی موجود ہوتی ہے۔  مگر دیکھا جارہا ہے کہ محکمہ موسمیات  کی جانب سے جاری کئے گئے الرٹ غلط ثابت ہورہے ہیں۔