بنگلورو، 13/اکتوبر (ایس او نیوز /ایجنسی)بنگلورو میں صحافی گوری لنکیش کے ملزمان کی رہائی کے بعد اُس وقت تنازعہ پیدا ہوگیا جب ہندوتوا تنظیموں کی جانب سے  ان ملزمان کو پھول کی مالائیں پہنا کر اور شال اوڑھ کر تہنیت کرتے ہوئے استقبال کیا اور ان ملزمان کے لیے مذہبی رسومات کا اہتمام بھی کیا گیا۔ اس دوران، کالیکا دیوی مندر میں پوجا کی گئی اور شیواجی مہاراج کے مجسمے پر پھولوں کی چادر بھی چڑھائی گئی۔

واضح ہو کہ بنگلورو کی سیشن کورٹ نے 9 /اکتوبر کو گوری لنکیش کے قتل میں شامل 8 ملزمان کی درخواست ضمانت منظور کی تھی۔ جس کے فوری بعد 11 اکتوبر کو انہیں جیل سے رہا بھی کر دیا گیا۔ اسی سال ستمبر میں بھی چار دیگر ملزمان کو ضمانت دے دی گئی تھی۔

گوری لنکیش ایک معروف صحافی اور ایڈیٹر تھیں، جو اپنے بے باک اور حقائق پر مبنی صحافتی انداز کے لیے جانی جاتی تھیں۔ انہوں نے مختلف سماجی اور سیاسی معاملات پر اپنی واضح رائے پیش کی، جن میں ہندوتوا نظریات پر ان کی تنقید شامل تھی۔ 5 ستمبر 2017 کو بنگلورو میں ان کے گھر کے باہر انہیں گولی مار کر قتل کر دیا گیا تھا۔ ان کے قتل نے ملک بھر میں صحافیوں، دانشوروں اور سماجی کارکنوں میں تشویش پیدا کر دی تھی۔ گوری لنکیش کا صحافتی سفر مختلف جرائد اور اخبارات سے منسلک رہا اور وہ اپنی آزادی اظہار کی حمایت میں ہمیشہ پیش پیش رہیں۔