تل ابيب ،23/اکتوبر (ایس او نیوز /ایجنسی) اسرائیل کی حماس اور حزب اللہ کے ساتھ جاری جنگ مسلسل شدت اختیار کر رہی ہے۔ اس شدید تنازعے میں چند مہینوں کے اندر ہی خطے میں ہزاروں بے گناہ افراد کی جانیں ضائع ہو چکی ہیں۔ حماس اور حزب اللہ نے اسرائیل کے خلاف طاقتور حملے شروع کر دیے ہیں، جس کی وجہ سے جنگ بندی کے امکانات میں کمی واقع ہو رہی ہے۔ حال ہی میں حزب اللہ نے اسرائیلی وزیر اعظم نیتن یاہو کے گھر پر ڈرون حملہ کیا، جس میں تو کوئی جانی نقصان نہیں ہوا، مگر اسے ایک اہم حملہ سمجھا جا رہا ہے۔ یہ واقعہ اس بات کی عکاسی کرتا ہے کہ صورتحال کتنی خطرناک ہو چکی ہے۔

اس درمیان حملے کی ایک تصویر بھی سامنے آئی ہے جس سے پتہ چلتا ہے کہ حزب کا حملہ کتنا خطرناک تھا۔ تصویر میں دیکھا جاسکتا ہے کہ کیسے نیتن یاہو کے بیڈ روم پر ہی حملہ ہوا اور اس کمرے کی کھڑکی کو نقصان پہنچا۔ یہ صاف ہے کہ حزب اللہ کا حملہ اپنے نشانہ پر تھا اور اس کا ڈرون نیتن یاہو کے بیڈ روم تک جا پہنچا۔ بتایا جاتا ہے کہ جس وقت یہ حملہ ہوا اس وقت یاہو اپنی رہائش پر موجود نہیں تھے۔

حملے میں بھلے ہی اسرائیلی وزیر اعظم کو کوئی نقصان نہ پہنچا ہو لیکن اسرائیلی ایجنسیاں فکرمند ہیں کہ مستقبل میں اگر کوئی بڑا حملہ اتنا نشانے پر لگا تو زیادہ نقصان ہو سکتا ہے۔ یہ ڈرون لبنان سے فائر کیا گیا تھا، جو سیدھے نیتن یاہو کی رہائش اور خاص طور پر ان کے بیڈروم کی کھڑکی پر جا کر ٹکرایا۔

ایک تصویر میں دکھائی دے رہا ہے کہ کیسے ڈرون حملے سے گھر کی کھڑکی کے شیشے ٹوٹ گئے ہیں لیکن وہ اندر نہیں جا پایا۔ اس کی وجہ یہ تھی کہ وہاں شیشہ بے حد مضبوط لگا ہوا تھا اور کچھ دیگر چیزیں بھی پروٹیکشن کے لیے تھیں۔