بنگلورو، 20/مئی (ایس او نیوز /ایجنسی) بنگلورو کورٹ نے کرناٹک کے سابق وزیر ایچ ڈی ریونا کو جنسی ہراسانی کے معاملے میں ضمانت دے دی ہے۔ خیال رہے کہ 42 ویں ایڈیشنل چیف میٹروپولیٹن مجسٹریٹ عدالت نے 66 سالہ سیاستداں کو عبوری راحت دی تھی۔ عدالت کے جج پریٹھ جے نے ایس آئی ٹی کی جانب سے اعتراض سننے سے منع کر دیا اور ایچ ڈی ریونا کو ضمانت دے دی ہے۔

خیال رہے کہ یہ مقدمہ 28 اپریل کو ہولیناراسی پورہ پولیس اسٹیشن میں درج کیا گیا تھا جس میں ریونا اور ان کے بیٹے پرجول ریونا کے خلاف 47سالہ نوکرانی کے خلاف جنسی ہراسانی کا الزام عائد کیا گیا تھا۔ پرجول ریونا کے تعلق سے کہا گیا تھا کہ وہ 27 اپریل کو جرمنی روانہ ہو گئے تھے اور ان کے خلاف بھی حراستی وارنٹ جاری کیا گیا تھا۔ انٹرپول نے ان کے خلاف بلیو کورنر نوٹس جاری کیا تھا۔

یاد رہے کہ 4 مئی کو پولیس نے ایچ ڈی ریونا کو حراست میں لیا تھا اور انہیں 4 دن کی پولیس تحویل میں رکھا گیا ۔ بعد ازیں انہیں عدالتی تحویل میں رکھا گیا تھا۔ اپنی عدالتی حراست کے اختتام پرانہوں نے ایم پیز اور ایم ایل ایز کی خصوصی عدالت سے مشروط ضمانت حاصل کی۔ایچ ڈی دیوے گوڈا نے اپنے بیٹے کے تعلق سے کہا تھا کہ ایچ ڈی ریونا اس معاملے میں بے قصور ہیں اور ان کے خلاف جھوٹے معاملات درج کئے گئے ہیں۔ انہوں نے یہ بھی کہا تھا کہ پرجول ریونا کو قانون کے تحت سزا دی جائے گی اور انہیں بچایا نہیں جائے گا۔