چنڈی گڑھ ، 5/ستمبر (ایس او نیوز /ایجنسی)  ہریانہ اسمبلی انتخابات سے قبل بی جے پی کو اپنے لیڈران کی بغاوت کا سامنا ہے اور کئی اہم لیڈران کا دامن چھوڑ رہے ہیں۔ دراصل، بھارتیہ جنتا پارٹی (بی جے پی) نے اپنے امیدواروں کی ابتدائی فہرست میں 9 موجودہ ارکان اسمبلی کو شامل نہیں کیا ہے اور اس کی وجہ سے پارٹی میں بے اطمینانی کی فضا ہے۔ اسی ضمن میں ٹکٹ نہ ملنے سے ناراض ہریانہ کے بجلی کے وزیر رنجیت سنگھ چوٹالہ نے بھی عہدے سے استعفیٰ دے دیا ہے۔

رپورٹ کے مطابق رنجیت چوٹالہ نے بی جے پی کے خلاف باغیانہ رخ اختیار کرتے ہوئے آزاد حیثیت سے الیکشن لڑنے کا اعلان کیا ہے۔ وہ 8 ستمبر کو رانیاں میں اپنی طاقت مظاہرہ کریں گے۔ رنجیت نے کہا کہ بی جے پی ہائی کمان نے انہیں ڈبوالی سے الیکشن لڑنے کی پیش کش کی ہے لیکن انہوں نے اس پیش کش کو ٹھکرا دیا۔ رانیاں سیٹ سے ٹکٹ نہ ملنے پر چوٹالہ نے کہا کہ وہ جلد بازی میں کوئی فیصلہ نہیں کریں گے۔

دریں اثنا، بی جے پی کو ایک اور جھٹکا اس وقت لگا جب پارٹی کے رکن پارلیمنٹ نوین جندل کی والدہ اور سابق وزیر ساوتری جندل نے بی جے پی کا ٹکٹ نہ ملنے پر باغی رویہ اپنایا ہے۔ ساوتری جندل نے واضح الفاظ میں کہا کہ وہ الیکشن لڑیں گی۔ اس بیان نے سیاسی ہلچل کو مزید تیز کر دیا ہے۔

قبل ازیں، رتیا سے موجودہ رکن اسمبلی لکشمن ناپا نے بھی پارٹی کو خیرباد کہہ دیا۔ بی جے پی کی فہرست میں ان کی جگہ سابق رکن پارلیمنٹ سنیتا دگل کو رتیا سے امیدوار بنایا گیا ہے۔ اس سے ناراض ہو کر لکشمن ناپا نے بدھ کی رات دیر گئے بی جے پی کے ریاستی صدر موہن لال بڈولی کو اپنا استعفیٰ بھیج دیا۔