فتح آباد (ہریانہ) ، 28/ستمبر (ایس او نیوز /ایجنسی)کانگریس کی رکن اسمبلی کماری شیلجا نے ہریانہ کے فتح آباد میں ایک انتخابی جلسے سے خطاب کرتے ہوئے عوام سے کانگریس امیدوار کے حق میں ووٹ دینے کی اپیل کی۔ اس موقع پر میڈیا سے گفتگو کرتے ہوئے انہوں نے کہا کہ یہ عوامی اجتماع اس بات کا ثبوت ہے کہ ہریانہ میں اس بار کانگریس کی حکومت بننے جا رہی ہے۔ کماری شیلجا نے مزید کہا، ’’ہمیں عوام کی حمایت حاصل ہے، اور ہم مکمل اکثریت کے ساتھ حکومت تشکیل دینے جا رہے ہیں۔ مجھے یقین ہے کہ نئی حکومت کے قیام میں اس علاقے کو بھی شامل کیا جائے گا، جس سے ترقیاتی کاموں کی رفتار تیز ہو گی۔‘‘

انہوں نے مزید کہا کہ مرکزی حکومت مرکزی تفتیشی ایجنسیوں کا غلط استعمال کر رہی ہے اور عدالت نے بھی اس پر سخت تبصرہ کیا ہے۔ یہ حکومت سیاسی انتقام کی سوچ کے تحت کام کر رہی ہے اور تمام آئینی اداروں کو ختم کرنے پر آمادہ ہے۔ کُماری شیلجا نے کہا، ’’میرا خیال ہے کہ ریاست بہ ریاست کانگریس کا گراف بڑھ رہا ہے اور ہم مضبوطی کے ساتھ اقتدار میں واپسی کرنے والے ہیں۔‘‘

بی جے پی حکومت کی ناکامیوں پر روشنی ڈالتے ہوئے کماری سیلجا نے کہا کہ اس حکومت نے ملک اور ریاست کو پسماندہ چھوڑ دیا ہے۔ آج ہر طبقہ مہنگائی، غنڈہ گردی اور کرپشن سے پریشان ہے۔ کسانوں کے ساتھ ساتھ سماج کے ہر طبقے کو اپنے مطالبات کے لیے جبر کا سامنا کرنا پڑا ہے۔ ریاست میں تقریباً دو لاکھ سرکاری ملازمت کے عہدے خالی ہیں، جنہیں کانگریس کی حکومت بننے پر پُر کیا جائے گا۔

قابل ذکر ہے کہ ہریانہ انتخابات کے دوران سابق وزیر اعلیٰ منوہر لال کھٹر نے کماری سیلجا کو بی جے پی میں شامل ہونے کی تجویز دی تھی۔ اس کا جواب دیتے ہوئے کانگریس نے کہا کہ بی جے پی کو پہلے اپنا گھر سنبھالنا چاہیے، ہم سب مل کر الیکشن لڑ رہے ہیں۔

خیال رہے کہ ہریانہ کی تمام 90 اسمبلی سیٹوں کے لیے 5 اکتوبر کو ووٹنگ ہونی ہے۔ 8 اکتوبر کو ووٹوں کی گنتی کی جائے گی اور اسی دن نتائج کا اعلان کر دیا جائے گا۔