مشی گن ، 20/اکتوبر (ایس او نیوز /ایجنسی ) ڈونالڈ ٹرمپ اور کملا ہیرس کے درمیان مقابلہ شدت اختیار کر رہا ہے، اور دونوں رہنما مشی گن میں پیشگی ووٹنگ کے دوران امریکی عرب لیڈروں کی حمایت حاصل کرنے پر توجہ مرکوز کر رہے ہیں۔ ڈیموکریٹک پارٹی کی امیدوار کملا ہیرس نے "مشرق وسطیٰ کی پریشانیاں ختم" کرنے کا نعرہ دیتے ہوئے جمعہ کو ملک کے واحد مسلم اکثریتی شہر کا دورہ کیا۔ یہ دورہ ان کی مہم کا ایک اہم حصہ ہے، جس کا مقصد مختلف کمیونٹیز کے ساتھ روابط مضبوط کرنا ہے۔

 واضح رہے کہ مشی گن ’سونگ اسٹیٹ‘ یعنی امریکہ کی ان ۷؍ ریاستوں  میں سے ایک ہے جن کے ’’الیکٹورل کالج ووٹ‘‘ صدارتی الیکشن کے نتائج کو پلٹ دینے کی حیثیت رکھتے ہیں۔ مشی گن میں  ۱۵؍ الیکٹورل کالج ووٹ ہیں۔ یہ تمام ووٹ اس امیدوار کو ملیں گے جو ریاست میں  اکثریت حاصل کرے گا، بھلے ہی یہ اکثریت کتنے ہی معمولی ووٹوں  کے فرق سے حاصل کی گئی ہو۔ اس کیلئے دونوں  لیڈروں  نے جمعہ کو شمال مغربی ڈیٹورائٹ کی اوکلینڈ کاؤنٹی میں  جہاں  ووٹوں  کی بڑی تعداد ہے انتخابی مہم چلائی۔ اس حقیقت کے باوجود کہ دونوں  امیدوار امریکی روایت کے مطابق اسرائیل کی بلاشرط حمایت کرتے ہیں، کملا ہیرس نے اپنی انتخابی مہم میں   حزب اللہ اور حماس کے خلاف اسرائیلی جنگ کا حوالہ دیا۔ انہوں  نے یہاں  بڑے پیمانے پر ہونےوالی اموات پر افسردگی کااظہار کرتے ہوئے اس سال کو مشرق وسطیٰ کیلئے ’’مشکل ترین سال‘‘قراردیا۔ اس کے ساتھ ہی انہوں  نے کہا کہ ’’یحییٰ سنوار کی موت کو ٹرننگ پوائنٹ ثابت ہونا چاہئے۔ ‘‘انہوں  نے کہا کہ ’’اس موقع کو جنگ بندی کیلئے استعمال کیا جانا چاہئے۔ ‘‘