پنجی ، 20 / نومبر (ایس او نیوز) گوا کی پولیس نے خلیجی ممالک میں گھریلو خادمہ کی ملازمت کے لئے خواتین کو   بھیجنے کے بہانے انہیں جسم فروشی کے کاروبار میں ملوث کرنے والے گروہ کا پردہ فاش کیا ہے اور دو ملزمین کو گرفتار کر لیا ہے جن کی شناخت سید عبداللہ شیخ (58 سال) اور مستان خان پٹھان (35 سال) کے طور پر کی گئی ہے ۔
    
میڈیا میں آئی رپورٹ کے مطابق پنجی کے ایس پی راہل گپتا کے بیان کے مطابق مسقط سے واپس لوٹنے والی ایک خاتون نے پولیس کے پاس شکایت درج کروائی تھی کہ کئی برسوں سے واسکو میں مناسب رجسٹریشن کے بغیر ٹریول ایجنسی چلانے والے عبداللہ شیخ اور پٹھان نے اسے ٹورسٹ ویزا پر مسقط میں گھریلو کام کاج کے لئے بھیجا تھا ۔ وہاں پر پہلے سے گیارہ خواتین موجود تھیں ۔ اس خاتون کو بھی ان کے ساتھ آٹھ دن تک ایک گھر میں رکھا گیا جہاں انہیں مناسب طریقے پر کھانا پینا بھی نہیں دیا گیا ۔ پھر اسے ایک گھر میں کام کرنے کے لئے بھیجا گیا جہاں اس کے ساتھ جنسی سرگرمیوں میں استعمال کرنے کی پوری کوشش کی گئی ، مگر وہ خاتون کسی بھی طرح ان کے پنجے سے چھوٹ کر واپس گوا لوٹ آئی ۔
    
پولیس کا کہنا ہے کہ اس خاتون کی شکایت پر کارروائی کرتے ہوئے  مذکورہ بالا دو ملزمین کو گرفتار کیا گیا ہے ۔ اس کے علاوہ ملزمین کے ذریعے مسقط بھیجی گئی  اور اس جال میں پھنسی ہوئی بقیہ 11 خواتین کو وہاں سے واپس لانے کے لئے کوششیں جاری ہیں اور اس ضمن میں ہندوستانی سفارت خانے کو معلومات فراہم کرنے کے اقدامات کیے گئے ہیں ۔ 
    
ایس پی راہل گپتا نے بتایا کہ باضابطہ رجسٹریشن کے بغیر چلائی جا رہی تمام ٹریول ایجنسیوں کے خلاف کارروائی کی جائے گی ۔ انہوں نے ملازمت کے لئے بیرونی ملک جانے کے خواہش مند افراد سے اپیل کی ہے کہ ملازمت کا باضابطہ لیٹر حاصل کیے بغیر ٹورسٹ ویزا پر ملک سے باہر جانے سے گریز کریں ورنہ اس قسم کی پیچیدگیوں کا سامنا کرنا پڑ سکتا ہے ۔