ممبئی، 16/نومبر (ایس او نیوز /ایجنسی) وزیر اعظم مودی اور بی جے پی لیڈروں کی جانب سے کانگریس کی قیادت والی کرناٹک حکومت کے بارے میں ’فیک نریٹو‘ پھیلانے کے خلاف اب کرناٹک کے وزیر داخلہ ڈاکٹر جی پرمیشور بھی میدان میں آگئے ہیں۔ انہوں نے دادر میں ریاستی کانگریس کے دفتر تلک بھون میں منعقد پریس کانفرنس کے دوران وضاحت دی کہ کرناٹک میں کانگریس کی جانب سے دی گئی ۵؍ گیارنٹیوں پر عمل شروع ہو چکا ہے اور ان کو نافذ کرنے کے لیے ۵۶؍ ہزار کروڑ روپے مختص کیے گئے ہیں۔ ان گیارنٹیوں میں سے گرہ لکشمی اسکیم کے تحت ہر خاتون کو ۲؍ ہزار روپے معاوضہ دینے کا فائدہ اب تک ایک کروڑ ۲۲؍ لاکھ خواتین کو مل چکا ہے۔

  کرناٹک کے وزیر داخلہ ڈاکٹر جی پرمیشورا نے کہاکہ حکومت کے قیام کے بعد کابینہ کے پہلے ہی اجلاس میں۵؍گیارنٹیوں پر عملدرآمد کا فیصلہ کیا گیا اور فوری عمل در آمد بھی شروع ہو گئی ہے اس کے باوجود وزیر اعظم نریندر مودی اور بی جے پی لیڈر کانگریس کی۵؍گیارنٹیوں کے بارے میں گمراہ کن  باتیں پھیلا رہے ہیں۔ 

  ڈاکٹر جی پرمیشورا نے کہا کہ کرناٹک میں کانگریس حکومت کی طرف سے شروع کی گئی ۵؍  گیارنٹیوں میں شامل گرہ لکشمی گیارنٹی کےتحت ہر ماہ ہر خاتون کے بینک کھاتے میں ۲؍ہزار روپے جمع کئے جا رہے ہیں۔ اس اسکیم سے اب تک ایک کروڑ ۲۲؍ لاکھ خواتین کے کھاتوں میں ۳۰؍  ہزار ۴۱۶؍ کروڑ روپے جمع کئے جاچکے ہیں۔ دوسری گیارنٹی گرہ جیوتی یوجناسے ایک کروڑ ۶۶؍  لاکھ مستفیدین ہیں اور ر۱۴؍ ہزار ۶۵؍ کروڑ روپے فنڈ مختص کیا گیا ہے۔ بے روزگار نوجوانوں کو نوکری ملنے تک ماہانہ ۳؍ ہزار روپے دینے والی تیسری گیارنٹی’یوواناندھی ‘کے تحت اب تک ۴؍لاکھ ۳۰؍  ہزار نوجوانوں نے فائدہ اٹھایا ہے اور اس کیلئے ۲۰۰؍ کروڑ روپے مختص کئے گئے ہیں۔ چوتھی ’شکتی‘ گیارنٹی کے تحت ہر خاتون کو کرناٹک حکومت کی بسوں میں مفت سفر کی سہولت مل رہی ہے اور اس گیارنٹی کےتحت ۳؍ کروڑ ۱۷؍ لاکھ خواتین مفت سفر کر چکی ہیں اور اب تک ۶؍ ہزار ۱۲۵؍ کروڑ روپے خرچ  ہو چکے ہیں جبکہ اَن  بھاگیہ گارنٹی کے تحت ۱۰؍  کلو اناج مفت دیا جا رہا ہے۔ اس گارنٹی سےایک کروڑ۱۵؍ لاکھ شہری مستفید ہوئے ہیں اور۸؍ ہزار ۲۲۹؍کروڑ روپے خرچ ہوئے ہیں۔ ان سب کے باوجود وزیر اعظم نریندر مودی اور بی جے پی لیڈر جان بوجھ کر غلط  باتیں پھیلا رہے ہیں۔