خواتین ووٹرز ہیرس کی طرف، مرد ووٹرز کی اکثریت ٹرمپ کے حق میں
واشنگٹن ،5/نومبر (ایس او نیوز/ ایجنسی)ایک حالیہ سروے رپورٹ میں یہ بات سامنے آئی ہے کہ امریکی خواتین ووٹرز کملا ہیرس کی حمایت کر رہی ہیں، جبکہ مرد ووٹرز کی بڑی تعداد ڈونلڈ ٹرمپ کے ساتھ ہے۔ ڈیموکریٹک امیدوار کملا ہیرس اور ریپبلکن امیدوار ڈونلڈ ٹرمپ نے اپنی حتمی ریلیوں اور تقاریر کے ذریعے اہم سوئنگ ریاستوں میں ووٹرز کو اپنی طرف متوجہ کرنے کی بھرپور کوشش کی ہے۔ سروے اور تجزیوں کے مطابق، دونوں امیدواروں کے درمیان قومی سطح پر اور خاص طور پر پنسلوانیا، مشی گن، اور نارتھ کیرولائنا جیسی ریاستوں میں سخت مقابلہ جاری ہے، جہاں کے نتائج انتخابات کے حتمی نتیجے پر نمایاں اثر ڈال سکتے ہیں۔
کملا ہیرس نے اپنی انتخابی مہم کی آخری ریلی فلاڈیلفیا، پنسلوینیا میں منعقد کی، جس میں انہیں لیڈی گاگا، رکی مارٹن اور اوپرا ونفری جیسی مشہور شخصیات کی حمایت حاصل رہی۔دوسری جانب ڈونلڈ ٹرمپ نے اپنی انتخابی مہم کی آخری ریلی گرینڈ ریپڈز مشی گن میں نکالی، جہاں انہوں نے اپنے بنیاد پرست ووٹرز کو امریکا کو دوبارہ مضبوط بنانے کا عزم دلایا۔دونوں امیدوار ان ریاستوں کے ووٹرز کو اپنی جانب راغب کرنے کی بھرپور کوششیں کر رہے ہیں۔ٹرمپ نے اپنی حالیہ تقاریر میں غیر قانونی تارکینِ وطن کے بارے میں سخت الفاظ استعمال کیے اور اسے ’امریکا کے لیے خطرہ‘ قرار دیا۔
انہوں نے یوایف سی UFC فائٹرز کو سرحدوں پر تعینات کرنے کی تجویز بھی دی، جس پر انسانی حقوق کے کارکنوں نے انہیں تنقید کا نشانہ بنایا۔تجزیہ کاروں کے مطابق ٹرمپ کی اس قسم کی بیان بازی ووٹرز کی توجہ حاصل کرنے کی حکمتِ عملی ہو سکتی ہے۔موسمیاتی تبدیلی اس انتخاب میں ایک اہم مسئلہ بن چکی ہے، ہیرس کا منصوبہ ہے کہ وہ موسمیاتی تبدیلی سے نمٹنے کے لیے انفلیشن ریڈکشن ایکٹ پر عمل درآمد جاری رکھیں گی اور ماحول دوست پالیسیوں کو فروغ دیں گی۔
ٹرمپ اس کے برعکس توانائی کی خود مختاری کے لیے فریکنگ کو بحال کرنا چاہتے ہیں اور پیرس معاہدے سے دوبارہ علیحدگی اختیار کرنے کے خواہاں ہیں، یہ مو?قف انہیں قدامت پسند ووٹرز کی حمایت میں مدد دے سکتا ہے۔دونوں امیدواروں کے مشرقِ وسطیٰ کے حوالے سے مو?قف نے مسلم ووٹرز پر اثر ڈالا ہے۔ہیرس کا فلسطین اسرائیل تنازع پر معتدل موقف اور اسقاطِ حمل کی حمایت کچھ مسلم ووٹرز کو ان سے دور کر رہا ہے، جبکہ ٹرمپ کا قدامت پسند اور اسرائیل کے حق میں مضبوط مو قف ان کے مخصوص ووٹرز میں مقبولیت بڑھا رہا ہے۔
ٹرمپ کے جنگ نہ کرنے کے وعدے کو بھی مسلم ووٹرز مثبت نگاہ سے دیکھ رہے ہیں۔خواتین کے حقوق اور اسقاطِ حمل کے معاملات اس انتخاب میں انتہائی اہمیت اختیار کر گئے ہیں۔ہیرس نے وعدہ کیا ہے کہ وہ اسقاطِ حمل کے حقوق کے تحفظ کے لیے قانون سازی کی حمایت کریں گی۔اس کے برعکس ٹرمپ نے اسقاطِ حمل کے خلاف سخت موقف اپنایا ہے۔
