کاروار ایم ایل اے ستیش سیئل کے خلاف ریاستی الیکشن کمیشن کے پاس شکایت - حلف نامہ میں حقائق چھپانے کا الزام
بینگلورو، 26 / ستمبر (ایس او نیوز) انکولہ - کاروار حلقہ سے کانگریسی ایم ایل اے ستیش سیئل کے خلاف ریاستی الیکشن کمیشن میں شکایت درج کرواتے ہوئے الزام لگایا گیا ہے کہ ستیش نے اسمبلی انتخاب کے وقت جو حلف نامہ داخل کیا تھا اس میں بعض حقائق کو چھپایا گیا ہے ۔
بینگلورو کے شیشادری پورم میں مقیم سرینواس نامی شخص نے جو شکایت درج کروائی ہے اس میں کہا گیا ہے کہ ستیش سئیل نے اپنے حلف نامہ میں اپنی بیوی کلپنا سائل کے نام پر موجود ملیکا ارجنا شپنگ پرائیویٹ لمیٹیڈ کمپنی کے تعلق سے معلومات درج نہیں کی ہے ۔ اس کے علاوہ کمپنی کے مالی لین دین سے تعلق رکھنے والے بینک کھاتے کی تفصیلات بھی درج نہیں کی ہے ۔ اس سے یہ معاملہ مشکوک ہوجاتا ہے ۔
شکایت میں یہ بھی الزام لگایا گیا ہے کہ ملیکا ارجنا شپنگ پرائیویٹ لمیٹیڈ کمپنی کے نام پر موجود زمین کو گروی رکھتے ہوئے ایم ایل اے ستیش سسئیل نے 63,90,19,813 روپے کا قرضہ حاصل کیا ہے ۔ مگر تیس سال کے لئے لیز پر لی گئی زمین کو گروی رکھنا غیر قانونی عمل ہے ۔ ستیش نے حلف نامہ میں کریڈٹ کے سلسلے میں کوئی تفصیل نہیں بتائی ہے بلکہ صرف سیونگس کی تفصیلات بتائی گئی ہے ۔ اس بنیاد پر شکایت کنندہ سرینواس نے الیکشن کمیشن سے ستیش سئیل کے خلاف کارروائی کا مطالبہ کیا ہے ۔
خیال رہے کہ حال ہی میں انتخابی حلف نامہ میں تفصیلات ظاہر نہ کرنے کے جرم میں ہائی کورٹ نے جے ڈی ایس کے رکن پارلیمان اور دیوے گوڈا کے پوتے پرجاول ریونّا کے خلاف ہائی کورٹ نے فیصلہ سناتے ہوئے پارلیمانی رکنیت کو باطل قرار دیا تھا ۔ لیکن سپریم کورٹ میں اپیل کے بعد ہائی کورٹ کے فیصلے پر اسٹے مل گیا ہے ۔ اس کے علاوہ انتخابی مہم کے دوران ووٹروں کو کوکرس تقسیم کرنے پر وزیر اعلیٰ سدا رامیا کے خلاف بھی الیکشن کمیشن کے پاس بدعنوانی کی شکایت درج کروائی گئی ہے ۔